Programa en bibo di dr. Horacio Oduber Hospital tabata un exito den 2022

Desde luna di april Horacio Oduber Hospital (HOH) y su profesionalnan ta yega mas cerca di comunidad pa medio di un programa cu ta hiba e nomber “AMI CUBO”. Un programa cu mensualmente ta bay “live” via facebook di HOH pa 11:00 am y asina tur esunnan cu “log in” por haya informacion y alabes haci pregunta di biaha na e invitado profesional den cuido. Siman pasa e ultimo programa “AMI CUBO” a tuma luga y ta mira atras na un aña exitoso unda durante shete programa a duna informacion importante y alabes a yega mas cerca di comunidad.

Departamento di comunicacion di HOH a cuminsa traha riba e plan aki den luna di maart y e nomber AMI CUBO a nace. AMI CUBO ta encera AMI, esta e hostess cu ta un colega di departamento di comunicacion hunto CUBO, esta comunidad di Aruba cu ta bay papia cu e profesional den cuido. Desde comienso e enfoke primordial tabata pa trece e profesional den cuido mas cerca di comunidad. Na HOH tin hopi profesional den cuido cu por brinda informacion importante y pa esunnan eyfo cu ta desea por haci nan pregunta via facebook y ta haya contesta di biaha na momento cu ta “live”. Un programa asina ta rekeri hopi preparacion y diferente persona cardinal pa hacie posibel. Team di deparamento di comunicacion tabata cla pa ranca sali y e prome programa “AMI CUBO” a bay LIVE den luna di april. 

E prome programa di AMI CUBO tabatin como invitado ciruhano general dr. Alex Ponson cu a enfoca riba e importancia di hiba un bida saludabel y tambe gastric bypass. Na luna di mei a papia cu ginecologo dr. Mianne van Kessel cu a conta nos tocante endometriose cual hopi hende muhe ta sufri di dje. Siguientemente a papia cu urologo dr. Jason Petronilia cu a enfoca riba un problema grandi na Aruba cu ta piedra den riñon. E ultimo dos añanan covid-19 a afecta mundo henter y pues a acerca specialista di pulmon dr. Caroline Becker cu a conta nos e efecto(nan) cu e pashentnan a keda cune. Internista dr. Bert Rodenburg durante e siguiente sesion “live” di AMI CUBO a toca un tema hopi taboe na Aruba y tambe mundialmente esta HIV/AIDS. E parti di curason no por a keda afo y a papia cu cardiologo dr. Robert Dennert riba e tema di atake di curason. Y pa culmina e aña a invita dietista Angelique Salsbach cu a enfoca riba Smart cu Carbs y alabes a duna tips con pa come balansa durante dianan di fiesta. 

Pues e lunanan yena di informacion pa un y tur, di curason pa riñon y mucho mas. Spera cu comunidad di Aruba por a wak un di e programanan aki y si a perde uno semper por haya nan bek riba facebook di HOH of por bay riba HOH su youtube. Alabes ta invita comunidad pa sigui HOH riba medio social pa keda na altura di tur loke ta pasa na Aruba su Hospital. Danki na e team completo dilanti y tras di camara pa haci AMI CUBO posibel y alabes danki na comunidad pe sosten di semper. Team completo di AMI CUBO ta cla pa ranca sali bek na januari 2023 cu mas informacion pa tur hende paso HOH semper t’ey!