Profesion di asisstent boticario ta hopi importante y por ta intenso

Diadomingo awo, 25 di september ta Dia di Asisstent Boticario. Pa e motibo aki, kier a trece profesion aki un tiki mas den atencion pa conoce kico e ta y con importante e ta den cuido medico. A combersa cu un profesional di e ramo pa conta un poco di su angulo.

Dasha Dubero, ta un boticario na Botica di Servicio. E ta splica cu e trabou di apotheker assistent of assistent boticario ta uno cu ta bay basta amplio caminda ta cumpli cu diferente funcion. Un di nan ta pa informa e clientenan, pero tambe procesa receta. Esaki ta nifica controla e receta, wak si e dosis ta corecto, wak si e ta pas cu e pashent su informacion cu ta den e sistema y, si ta necesario, puntra e dokter pa mas informacion.

Otro parti importante ta pa evalua e pashent nan dilanti y wak si, por ehempel, e tin dos remedi cu no por bay bon hunto. Den un caso asina, ta alerta di biaha y informa e dokter y e pashent si esey ta necesario. Si tin cualkier duda, por puntra ami e ora pa mas informacion.

E estudio di assistent di boticario ta uno cu e persona ta realisa na Educacion Profesional Intermedio (EPI) y tin un duracion di 3 aña. Bo por hacie ora bo caba cu MAVO.

“Mi ta kere, paso e ta un estudio den gezondsheidszorg, dus den cuido medico, pero bo no tin e contact cu pashent mane bo lo tin cu, por ehempel, un nurse of un verpleegster. Dus bo no ta deal cu sanger, bo no ta deal cu e pashent. Esey ta haci’e basta atractivo pa via cu bo ta keda den e mundo di cuido medico y bo trabou ta hopi importante, pero si bo no gusta sanger, ni nada di esey nan, bo lo cay den esaki e ora.”

Dubero ta resalta e importancia di e trabou door cu e assistent boticario ta e ultimo stap den e proceso pa un pashent por cuminsa cu nan remedi. P’esey nan ta tuma nan trabou hopi na serio, pasobra esey kiermen cu nan tin cu zorg pa nada no bay fout y tambe pa e pashent por ta safe y e por tuma su remedinan na e manera corecto. Esey ta loke ta pone cu e por ta basta intenso, door cu nan tin cu zorg pa e pashent por haya e remedi y pa e use na e manera corecto.

Dubero: “Mi mensahe mas grandi eigenlijk ta cu nos trabou ta encera basta. Nos ta haci hopi patras di e cortina, anto esey ta pone cu, ya toch mi ta kere cu e comunidad mester sa pa tene un tiki pasenshi cu nos na balie door cu nos ta haciendo hopi pa nan siguridad, nan remedinan dus tene pasenshi.”

Un ultimo conseho di e assistent boticario na e pashentnan, ta pa percura pa sa pakico ta uza un remedi y cu semper tin un lista di remedi cu bo. Si cualkier cos mester pasa y mester bay hospital of otro dokter, nan sa precies ki remedi bo ta tuma. Si tin algun duda of kier mas informacion, sa cu e assistentnan boticario t’ey pa yuda bo cu esaki.