Pro-Tec Mechanical Contractors ta join Van Dorp Groep

Siman pasa Pro-Tec Mechanical Contractor Aruba N.V. a uni na Van Dorp Groep di  Hulanda, un compania renombra den brinda servicio tecnico innovativo y sostenibel cu  un entrada anual di 270 miyon euro. Pro-Tec ta continua opera bou di su propio nomber. 

Pro-Tec a lanta na Aruba na 1995 y despues di casi 25 aña, a desaroya den un specialista den  e tereno di proyecto mecanico y di refrigeracion. Awendia Pro-Tec a crece pa bira un compania  di casi 100 empleado cu ta realisa instalacion, mantencion y reparacion pa e sector turistico,  industrial y comercial. Adicionalmente, Pro-Tec ta distribuidor di airco di calidad halto y cu ta  spaar energia pa cliente residencial.  

“Innovacion, profesionalismo y sostenibilidad ta algun di nos aspectonan clave, tanto pa e  compania, como pa e consumidor”, asina Managing Director di Pro-Tec Fred Steeghs a afirma.  “Pa e motibo ey Van Dorp Groep ta cuadra bon cu nos!”. 

Van Dorp Groep (www.vandorp.eu) ta un negoshi familiar funda na 1985 door di Henk Willem  van Dorp cu a crece pa bira un proveedor tecnico cu diferente sede rond di henter Hulanda. Van  Dorp ta ofrece un pakete total di servicio y instalacion tecnico y ta specialisa den, entre otro,  concepto di energia sostenibel, siguridad, proteccion contra candela, automatisacion industrial y  pisina. 

Den tur servicio, sostenibilidad y reduccion den consumo di recurso natural, manera  electricidad, gas y awa, ta central. Van Dorp Groep tin 22 oficina rond di Hulanda dunando  empleo na cerca di 1.500 trahado.  

“Awo cu nos ta opera den Van Dorp Groep, esey ta habri hopi posibilidad pa nos”, Steeghs ta  añadi. “Nan ta conta cu un cantidad enorme di conocemento y experiencia, di cual Pro-Tec  tambe tin acceso. Pero esey no ta tur. Tambe riba e tereno di ICT y ekipo nos por beneficia di e  bentahanan adicional di Van Dorp Groep,” Steeghs a enfatisa. 

Van Dorp Groep ta hopi activo na Hulanda den e transicion di energia y ta duna hopi prioridad  na e optimalisacion di sostenibilidad di instalacion y edificionan. “Hustamente e operacion  comercial pro ambiental ey ta loke a hala nos atencion”, Steeghs a comenta. Tanto Pro-Tec, como Van Dorp Groep kier minimalisa e impacto riba naturalesa; no solamente door di realisa  proyectonan sostenibel pa e clientenan, pero tambe door di e sostenibilidad di su propio structura  y logistica. E mision y vision di ambos compania ta complementa otro, caminda e ser humano y  naturalesa ta central.  Cu e entrada den Van Dorp Groep, Pro-Tec ta prepara pa futuro y loke Steeghs ta mira como  un futuro sostenibel. “Nos tin varios area en comun, no solamente den suministro di servicio,  pero tambe den e esfuerzo pa laga nos planeta y claro, Aruba, lo miho posibel pa e proximo  generacionnan. Y esey nos ta bay logra hunto”, segun Steeghs.