Preparacion di Cuerpo Policial Aruba pa nan mensahe di fin di aña

Cuerpo Policial Aruba un biaha mas ta den pleno preparacion pa lansamento di un otro mensahe di fin di aña. E aña aki altocomisario di Polis Ramon ARNHEM a duna e departamento di comunicacion di polis e luz berde, pa presenta un mensahe den forma di un video pa nos comunidad.

Cada aña ta diferente, pero e meta en comun ta pa ilustra y yama danki pa e aña cu a pasa den forma di un jingle. Esaki ta un regalo netamente saca for di curason di e 600 homber y muhenan balente di Cuerpo Policial pa pais Aruba.

Tabata den tapara cu e tema di e aña aki ta “Hunto manera un Pais.” Un idea cu a nace un biaha mas pa polis brigadier Roque Angela, cu lo guia y produci e mensahe di fin di aña. Un produccion traha door di polis y presenta pa polis bou di e departamento di comunicacion, informacion y prevencion di Cuerpo Policial cu ta  Lito Lacle y Liliana Rasmijn.

“Hunto manera un Pais” ta ilustra cu ariba nos pais tin diferente nacionalidad ta biba manera: Mericano, Curasoleño, Dominicano, Chines, Colombiano, Filipino etc. Tambe tin diferente nacionalidad den nos organisacion policial. Pero locual ta keda mesun cos ta, cu nos tur tin un meta en comun pa hiba nos pais padilanti y carga un solo bandera cu ta di Aruba.

Esaki tambe locual lo refleha den e mensahe. Meta principal di e altocomisario ta, pa hunto progresa, hunto bay dilanti, hunto pasa door di reto y hunto celebra mañan.

Den coolaboracion cu Departamento di Cultura, bou guia di John Freddy Montoya y Robert

Maduro, cu mesora a accede pa yuda cu e produccion e aña aki. Ta gradici tur agente policial, brigadier Nigal Vrolijk, personal administrativo di polis, e gruponan di baile, Siegfried Dumfries di DCA, Elite Produccion, Jonathan Croes, Alma Folklorico y Alex Heijkoop director di Flora Market pa nan yudansa den realisacion di e mensahe aki.

Comunidad, e islanan rumannan y tambe for di Hulanda tabata puntra ki dia nos ta saca nos mensahe. Dia 22 di december 2022 exactamente pa 11:00 mainta, bibo ariba pagina di facebook di Korps Politie Aruba lo lansa e mensahe di fin di aña.

Di parti Cuerpo Policial Aruba, un feliz cambio di aña y gosa di e mensahe!