Polis na mesa cu comercio: Costo di bida ta espantoso

Diamars mainta a tuma luga un encuentro entre Roland Maduro, vice presidente di Sindicato di Polis Aruba (SPA) y directiva di Comerciantenan Uni Aruba (CUA). Na salida a papia cu Maduro kende a indica cu ambos organisacion a considera necesario pa tene un intercambio di informacion.  E siguiente paso pa SPA ta pa bay bek nan sede y comparti cu miembro pa posteriormente tuma decision di kico ta e siguiente paso pa tuma.

“Den seno di deliberacion tin intercambio di informacion, di idea. Kico ta bay haci, ki accion por tuma y wak pa futuro di e ciudadano ey’fo,” asina Maduro a expresa. E sindicalista a duna di conoce cu semper polis a haya un bon sosten for di tur sector di comunidad, incluyendo comercio. “Net di gobierno cu ta esun cu ta paga nos, nos no ta haya e sosten. Esey ta jammer.”

Pa loke ta trata e contenido di  e reunion, Maduro a indica cu for di CUA a tende basicamente loke nan a trece dilanti caba siman pasa na prensa. Algun di e puntonan cu ta referi na dje ta e costo halto di haci negoshi, e sistema di cobra invoerrechten na negoshi y particular sin tene cuenta cu descuento cu ta haya y tambe e introduccion prematuro di BTW y con esaki por afecta economia di Aruba. Pa SPA, e manera con esaki ta afecta e situacion ta manifesta den un incidencia mas halto di problema social y di criminalidad.