Polis di districto Oranjestad a haci diesdos famia feliz

Yegando na un otro fin di aña, e polisnan di districto Oranjestad ta duna bek un biaha mas na nan districto. Desde 2015 a lanta un concepto pa trece felicidad y alegria na famia menos afortuna y tabata e momento ey cu “E Luz di pasco” a nace y bira un realidad. 

Cada aña diferente famia di menos recurso ta haya un bishita inespera for di e famia di Cuerpo Policial y altocomisario Ramon Arnhem. Awe un biaha mas por sigui mira e sonrisa, alegria y emocion di e famianan cu ta haya un macutu grandi di comestibel, ham, galiña pa por pasa un Pasco feliz. 

E districto di Oranjestad cu ta consisti di polis uniforma, personal administrativo, Bureau Slachofferhulp, Tourism Oriented Police (TOP) a bishita diesdos famia den necesidad, pero tambe cu sosten di comercio cu a haci cu Luz di Pasco por a bira realidad un biaha mas.

Bou musica y cu diferente patruya a pasa den cada bario di Oranjestad. Famia a habri nan porta yena cu emocion y alegria na momento cu e patruyanan a yega dilanti nan port’i cas. Cu awa na wowo a gradici e polisnan pa nan gratitud. Polis di nan banda a baila y canta pa cada un famia deseando nan un bon Pasco y un feliz cambio di aña 2023.

Maske con fastioso y dificil e situacion porta e meta principal ta pa cada famia cu a wordo scogi por celebra un Pasco feliz. Yena cada un famia nan curason cu e luz positivo y cu den bida tur hende merece e oportunidad di por celebra un Pasco y aña nobo cu dicha, paz y prosperidad.