Platform Veiligheid in de Kinderopvang ta enfoca riba prevencion na centro di cuido pa baby

Un Plataforma multi disciplinario cu lo brinda conscientisacion y prevencion den e centronan di cuido di mucha, pa baby di seis siman pa diesdos luna.

Siman tras di lombra, gobierno a reuni cu e “Platform Veiligheid in de Kinderopvang”, cu ta encarga pa crea un ambiente mas sigur di conscientisacion y prevencion den e centronan di cuido di mucha pa tur e babynan di 6 siman pa 12 luna.

Diferente organisacion riba tereno social, salud y cuido, cu ta kere den e tema “Ta tuma un comunidad pa lanta un mucha”, a uni y forma un Plataforma multi disciplinario. E Plataforma ta consisti di varios miembro, di entre otro, Directie Volksgezondheid/Jeugdgezondheidszorg, Stichting Wit Gele Kruis, Fundacion Pa Nos Muchanan, Stichting Rode Kruis, Ambulance y Departamento di Mucha y Hoben.

E Plataforma aki ta presidi door di Noemi Maduro. Noemi manera conoci, a pasa den un situacion na unda cu el a perde su yiu, baby Noah den un forma repentino y doloroso. A indica cu tin un respet pa Noemi, kende a sa di haci uzo di su dolor y duele di e perde su baby, pa yuda otro y no pasa den e mesun circunstancia.

Gobierno di Aruba for di e tempo ey, a duna su compromiso cu algo asina no mester pasa nunca mas. Pa e motibo aki, e iniciativa aki ta un iniciativa bon y positivo. E “Platform Veiligheid in de Kinderopvang”, den cooperacion cu Rotary Aruba y RBC, a logra pa traha e poster y bukinan cu por comparti cu tur e centronan di cuido di nos muchanan.

“Mi ta haci un apelacion na tur esunnan cu ta cuida di muchanan chikito. Nan ta hopi delicado y mester di hopi atencion. Ban duna tur di nos parti pa nos cuida nan y pa evita pa cualkier incidente pasa nan”.

E centronan di cuido hopi biaha kisas no ta ekipa cu tur informacion. Pa e motibo aki, tin fundacion, instituto y e plataforma aki, cu ta cla pa yuda y duna un man pa haci e centronan di cuido sigur pa asina duna trankilidad na e mayornan. “Ban haci uzo di e ayudo cu gobierno y e plataforma aki ta brinda y percura cu loke cu a pasa cu baby Noah no pasa nunca mas”.

Gobierno y tambe Presidente di Parlamento, Edgard Vrolijk a ricibi e poster di informacion cu lo ta poni na tur centro di cuido di nos muchanan.