Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 28 novèmber 2022
Tópiko: Petishon pa reunion tokante di introdukshon di e Caraibische gulden i su konsekuensia pa pueblo di Kòrsou
Apresiabel Sra. America-Francisca,
Resientemente nos a tuma nota den medianan di komunikashon ku Banko Sentral awor si lo bai introdusí e florin Karibense pa tantu Kòrsou komo St. Maarten. Nos ta di opinion ku esaki lo tin konsekuensia grandi pa gobernashon, nos ekonomia, empresanan, nos abitantenan, tambe pa mundu finansiero aki na Kòrsou.
Pa nos komunidat por tin mas klaridat pa loke ta e tópiko aki i kiko e kambio di moneda nashonal aki ta nifiká pa nos komunidat nos ta proponé pa kuminsá duna pueblo informashon for di awor . Esaki ta bon te asta promé ku kuminsá ku e preparashonnan. Esaki lo sigurá ku pueblo ta debidamente informá i por prepará pa loke ta e kambio grandi aki. Nos ta pensa por ehèmpel esnan ku pa un òf otro motibu tin hopi sèn cash warda na kas òf ta sirkulá sin yega banko. Nos ta spera di por diskutí i debatí ampliamente riba e tópiko aki pa asina ku un i tur por ta prepará pa e proseso interesante ku lo bai sigui awor. P’esei hasiendo uso di artíkulo 33 di nos Reglamento di Òrdu, Frakshon di PAR ta pidi un reunion di komishon sentral ku e tópiko:
” Introdukshon di e florin Karibense i su impakto riba nos komunidat.”
Pa e reunion aki nos ta invitá Minister presidente , Minister di Finansa i Gerensia di banko sentral pa ta presente na e reunion aki.
Nos ta supliká presidente pa yama e reunion aki promé ku nos trata e presupuesto di e aña 2023.
Atentamente,
Frakshon di PAR
Zita Jesus-Leito, MBA
Ana Maria Pauletta
Quincy Girigorie
Steven Croes
