Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 28 di febrüari 2023
Tópiko: Petishon pa dirigí pregunta na Minister Cooper
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Tráfiko, Transporte i Planifikashon Urbano, señor Ing. Charles Cooper.
Danki pa e koperashon.
Atentamente,
Juniël R Carolina
Parlamentario pa
frakshon di MFK
Minister di Tráfiko, Transporte i Planifikashon Urbano
Señor Ing. Charles Cooper
PRESENTE
Kòrsou, 28 di febrüari 2023
Tópiko: Atenshon pa mas seguridat den tràfiko den area di Bandariba
Apresiabel señor Minister,
Pa medio di esaki suskrito Juniël Carolina, miembro di Parlamento di Kòrsou pa frakshon di MFK ta aserká bo persona komo minister enkargá ku Tráfiko, Transporte i Planifikashon Urbano (VVRP) ku e siguinte petishonnan pa wòrdu honra:
Na prome luga pèrmiti mi, felisitá bo persona komo minister enkargá ku Tráfiko, Transporte i Planifikashon Urbano (VVRP) pa e forma profeshonal i serio ku bo ta ehersé e trabou ministerial i muy prinsipal pa e manera ku bo persona ta duna atenshon i dedikashon pa tur e tantísimo problemanan ku tin den e ministerio aki.
Suskrito a risibí basta reklamo serka habintantenan di e diferente barionan den e area di Bandariba esakinan riba entre otro yenamentu di buraku ku asfalt, drechamentu di kayanan di tera, lusnan di tráfiko, instalashon di drèmpel i bòrchinan di tráfiko den algun kaya(pa asina frena velosidat haltu i evitá aksidente den tráfiko), roinan sushi i paradanan di bùs ku mester di banki i dak. Tambe tin petishon pa konsiderá algun kaya den e area di Bandariba komo vianan prinsipal, pa asina e kareteranan aki tambe risibí servisio di limpisia i mantenshon mensualmente.
Konsiderando ku e petishonnan di e habitantenan ariba menshoná ta di sumo importansia, mi ta aserká minister Charles Cooper ku e siguiente preguntanan;
- Minister Cooper por splika ta dikon e yenamentu di burakunan ku asfalt den área di Bándariba a stanka?
- Ki dia eksakto Kadushistraat ta wòrdu drecha ku un kapa di asfalt nobo?
- Ki dia ta kumisa raspa kamindanan di tera ku ta den mal estado den área di Sta Catharina, Popo, Jan Luis, Cocori, Ma Louisa, Kent u Zelf, Sta Rosa, Scherpene, Rooisantu, St Joris, Montaña, Choloma, Sabana Cras, Seru Grandi, Fuik i Seru Macho i Kura Buriku?
- Ki dia minister por laga OW instalá drèmpel i/o bòrchinan di tráfiko riba kaminda Zapateer den e bario di Zapateer den e bògt kaminda 28 biaha tabatin aksidente di tráfiko i tambe riba kaminda Bam Bam Hensley Muelens i bisindario di e krusada di kaya Harmonia, Arcoiris i asina frena velosidat haltu i evitá mas aksidente ku morto den tráfiko?
- Minister Cooper por nombra kaya Chano Margaretha i Kaya Venazio Isenia komo kayanan prinsipal i asina e kayanan aki tambe wòrdu pone riba e lsita di kayanan prinispal i asina nan tambe risibí limpiesa i mantenshon mensualmente?
- Ki dia e proyekto di lusnan led ta yega Bandariba?
- Konsiderando ku tin hopi reklamo riba parada di bùs suskrito kier sa ku minister Cooper tin un plan pa ku paradanan di bùs engeral na Kòrsou?
Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento, pa asina e habitantenan por haña atenshon riba nan preokupashonnan.
Atentamente,
Juniël R Carolina
Parlamentario pa
frakshon di MFK
