Pastoor Marcel Balootje: Urgente, urgente, sali for di scuridad

Pasobra nos lucha, no ta contra carni y sanger, sino contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e luganan celestial (Efesionan 6:12).

Esaki ta e mensahe cu nos a tende di dj’E y ta anuncia na boso, cu Dios ta luz y den dje no tin nada, nada di scuridad (1 Juan 1:5). Esaki ta e condenacion cu e luz a bini den mundo. Hende tabata stima e scuridad mas cu e luz, pasobra nan echonan tabata malo. Pasobra esun cu ta haci maldad ta odia e luz, y no ta bini na e luz pa su echonan no wordo exponi (Juan 3:19-20).

Cuanto mas nos mester splica nos hubentud tocante di luz y scuridad. Cuanto mas bida mester bay perdi, cuanto accidente mas mester sosode. Cuanto mayor mas mester yora perdida di nan yiu prome cu e hobennan por scucha.

Hoben, un cos nos por bisa boso cu diabel ta real, y cu diabel ta cana rond buscando ken e por destrui. Y den cada hende desobediente na Dios, e ta traha un estadia den nan mente caminda pa asina e autorisa maldad (Juan 10:10 -Santiago 4:7).

Specialmente den e luna aki cu tin celebracion di e fiesta di Halloween. Algo cu nan ta bisa ta wega, pero cu tin un profundidad satanico. Algo cu a bira un negoshi, pero den dje tin un daño mental y spiritual pa hopi hende.

Locual abo ta mira como un wega ta cuminda pa diabel, pasobra hopi ta anuncia fiesta publicamente. Pero con ta para cu e fiestanan cu ta tuma luga scondi, esunnan di grupito, cu kier experimenta.

Mayor por fabor no coopera cu maldad, no permiti ningun fiesta di scuridad tuma luga na bo cas. Y hasta e hotelnan mester tene cuenta, pasobra nos ta un isla turistico, pa no permiti bagamunderia satanico tuma luga den e cambernan.

Hesus a bisa lo siguiente: Pa habri nan wowo, pa nan bira for di scuridad pa luz y for di dominio di satanas na Dios, pa nan ricibi pordon di pica,y un herencia entre esunnan cu a wordo santifica pa medio di fe den Mi (Hechonan 26:18). E uzo di alcohol y droga, e coremento burachi causa accidente, e canamento cu arma, e violencia, e tiramento, e inmoralidad sexual tur ta obranan di scuridad.

E asunto di genero cu operacion pa cambio di sexo di hoben , tur e cosnan cu ta drentando tur caminda rond mundo y cu nos ta roga na Dios pa nan no yega aki banda, ta e echonan di scuridad. Pasobra scuridad semper ta bay contra e berdad, boluntad, y principionan di Dios.

Nos mester tene cuenta cu ley por cambia of kibra, pero e principionan estableci pa Dios ningun hende por cambia nan. Anochi ta cerca di pasa y dia ta cerca di habri. P’esey laga nos pone e obranan di scuridad un banda y bisti e armadura di luz (Romanonan 13:12). Corda bon cu luz y scuridad no tin comunion cu otro.

Mayor cada biaha cu abo permiti bo yiunan ta haci e cosnan for di regla, abo mes ta fia auto na un menor di edad, sin rijbewijs pa asina e sali cu su amigonan y core cu icejug den bahul yena cu ijs y bebida alcoholico. Bo ta habriendo porta di scuridad pa bo propio yiu.

Scuridad kier tapa mundo completo,pero Cristo Hesus ta e luz di mundo, y si nos ta na Su banda, scuridad lo aleha for di nos (Juan 8:12).