Pastoor Marcel Balootje No laga e diabel sembra nada den bo mente

Nos mente ta un parti masha importante di nos bida, y uno masha delicado, ora nos tin un problema den nos mente nos no por opera manera ora nos tin problema cu tripa, un pida tripa por wordo kita y e bida ta sigui funciona normal.

No ta existi operacion di mente den cual un piesa por wordo cambia, of un transplante por tuma luga y asina reforsa nos mente.

Bijbel ta siña nos algo masha importante, cu diabel por ataca nos mente, door di trece pensamento malo den dje y asina hiba nos na pica (Hechonan 5:3-5). Tin hopi hende cu a haci maldad specialmente den e area di abuso di mucha, cu e maldad a drenta nan mente, y nan a cana cu ne te ora e bira realidad, y awor nan ta cera pa hopi tempo y awor nan ta realisa cu e cos ey no ta bini di Dios (Santiago 1:13-15).

Bijbel ta splica nos lo siguiente y ta bon pa tur hende lesa y compronde. Y asina nos ta libera:

Den Mateo capitulo 13:24+25+26 e bijbel ta conta nos di e cunukero cu a sembra su cunucu y e enemigo (diabel) a bini sembra yerba shimaron den dje.

Y den Mateo 13:27+28 ta para skirbi: Y e esclavonan di e doño di cunucu a bin bis’e, Señor no ta bon simia bo a sembra den bo cunucu, dicon anto tin yerba shimaron aden.

Y e a bisa nan: Ta un enemigo a haci esaki.

Den Mateo 13:37 Hesus ta splica: Esun cu ta sembra e bon simia ta e Yiu di Hende.

E cunucu ta e mundo.

E bon simia ta e yiunan di e reino.

E yerba shimaron ta e yiunan di e malvado.

Y e enemigo cu a sembra nan ta e diabel y e cosecha ta e fin di mundo.

Esaki ta un splicacion cla y raspa, pa nos compronde cu e diabel ta sembra maldad den hende su mente, e tin nan mente domina. Asina e tin nan bida domina, y si no tin arepentimento e final lo ta tristo.

Cuanto hende no ta cana bao di stress y depresion y ta bao di tratamento pasobra e diabel a hinca cos den nan mente. Laga nos tene bon cuenta cu Dios no ta sembra nada malo den mente di ningun hende (Santiago 1:13).

Pasobra e maldad sembra pa diabel ta crece bira un mata y e mata ta duna fruta di maldad. Pasobra e ta bini for di un fuente di maldad.

Cuanto hende no ta venga y mata pasobra nan mente ta yena cu orguyo ,rabia y odio? Cuanto hende no ta abusa di mucha pasobra maldad ta domina nan mente? Cuanto hende no ta papia malo di otro pasobra nan mente ta yena cu maldad? Y cuanto inmoralidad ta tumando luga pasobra hende a permiti diabel sembra perversidad den nan mente?

P’esey Hesus a bisa den Mateo 15:13: Tur mata cu mi Tata celestial no a planta lo wordo ranca cu raiz y tur. Aki nan Hesus ta demostra cu tin cosnan ( tradicion) cu por drenta nos mente y curason cu no ta di Dios y nos tin autoridad di ranc’e cu reis y tur den nomber di Cristo Hesus, cuminsando for di e palabra malo di mas chikito. P’esey ta asina importante pa nos acepta Cristo Hesus den nos bida, y biba segun palabra di Dios.

Tira un bista rond y comproba pa bo mes cuanto hende a permiti e enemigo ( diabel) planta maldad, inmoralidad, inhusticia den nan bida, y ta bibando den scuridad y bao di un integridad falso. No ta pornada Santiago 4:7 ta bisa: Somete boso na Dios resisti e diabel y e lo huy for di boso.