Pastoor Marcel Balootje: Mita berdad tambe ta mentira

Mita berdad ta enemigo di honestidad, mita berdad ta bini for di un fuente cu sa e berdad pero kier haci cierto beneficio personal, cultural,economico, politico,religioso, diabolico, sin tene cuenta e daño cu por wordo haci na bida di hende, basta nan mantene hende bao di nan dominio.

Mita berdad a cuminsa ora Eva y e colebra (diabel) tabatin nan encuentro den cual Eva tabata sa cu no tin mag, Eva a kere mita berdad, pasobra e diabel a bis’e cu si bo come bo wowo lo habri y lo bo bira mescos cu Dios (Genesis 3:1-5).

Mita berdad ta aparece den Mateo capitulo 4:5-7 caminda e diabel a tenta Hesus, uzando hasta palabra di Dios (Salmo 91:11-12), pero Hesus a reprende y bis’e cu tambe ta para skirbi: No tenta Señor bo Dios.

Mita berdad ta bin bek den e historia di Ananias y Safira (Hechonan 5:1-10) kendenan por a duna locual cu nan tabata kier, pero a laga satanas gaña nan pa asina nan priminti algo y no hacie manera nan a bisa.

Hopi hende lo wordo decepciona, y hopi hende bay perdi, pasobra nan no a kere locual Dios a bisa, por ehempel: Pasobra Dios a stima mundo asina tanto E a duna Su Yiu unigenito, pa ken cu kere den dj’E no bay perdi ma tin bida eterno (Juan 3:16).

Awor cu bo ta na bida, bo tin di kere, acepta y biba pa Cristo, pasobra ora bo muri nada mas no por wordo haci pa bo, ningun cambio no por tuma luga despues di morto, pasobra ora bo tabata na bida bo no tabatin tempo pa Dios (E Rico y Lazaro Lucas 16:19-31).

Prueba di esaki ta para skirbi den 1 Tesalonisenses 4;16-18: Pues Señor mes lo baha for di cielo cu un grito, cu bos di arcangel,y cu trompet di Dios, y e mortonan den Cristo (esunnan cu a kere den Cristo prome cu nan a muri) nan lo lanta prome, e ora ey nos cu ta na bida y cu a keda, lo wordo tuma den e nubianan hunto cu nan pa contra cu Señor den laira y asina nos lo ta semper cu Señor (lesa 1 Thesalonisenses 4:13-18).

Den nos bida di tur dia, tin hopi mita berdad ta wordo uza pa trastorna bida di hende, por ehempel ora ta trata di droga y alcohol semper bo ta tende cu un slok of un sneif no ta haci nada, y despues di tempo adicion ta tuma luga.

Mas ainda ora hende ta integro den oficina, pero despues di 5:00 pm cranchi di infieldad y inmoralidad a habri, bisando asina cu ta nos bida priva. Pero bida priva pa ken? Esey ta conta solamente pa bista di hende, pero pa Dios ningun hende por sconde.

Ta tempo pa lanta nos standard di bida, nos tur a peca, nos tur a faya, Dios ta duna nos tur e mesun oportunidad di drecha cos, bini cerca Cristo Hesus y biba drechi, nos no tin mester di wak riba hende, nos tin di wak riba Cristo Hesus esun cu a salba nos y ta responsabel pa nos bida.

Cuanto mama soltero no tin awendia, cu a kere den mita berdad cu al final a resulta den gran mentira.

Cuanto hoben no a cay cera, pensando cu nan ta bira gangster, biba for droga y ladronicia, y pensando cu ley lo no pone man riba nan (Proverbionan 1:10-16).

Tin un gran berdad cu tur hende mester sa y no laga ningun hende gaña bo esey ta: Revelacion 20:11-15. Esaki ta conta pa tur esunnan cu rechasa Cristo Hesus awor cu nan ta na bida.

Mita berdad tambe ta mentira.