Pastoor Marcel Balootje: Laga nos prepara pa celebra Pasco di Nacemento

Pa tur hende cu ta kere den Hesus, stima Hesus, biba pa Hesus, y adora Hesus, esaki ta e momento di gran celebracion berdadero, pasobra locual nos ta celebra ta locual a sosode di berdad y e ta para skirbi.

Durante hopi aña a bini hopi distraicion , y comercio den e gran fiesta aki, hasta paganismo a drenta, y hopi a cuminsa discuti tocante di e fecha,locual no ta importante,pasobra hende no mester discuti tocante di Dios, locual tur hende mester haci ta obedece Dios.

Un kier celebra cu kerstboom, otro kier celebra sin kerstboom,sin papa nouel, of sin luz,un ta come ham e otro no ta come ham pero e fiesta di Pasco di Nacemento di Hesus, como e fiesta di Pasco di Resureccion di Hesus, no ta fiesta di tradicion, pero pa nos tur cu stima Cristo Hesus e mester ta fiesta di nos curason. Pasobra tanto na nacemento, como na morto di Hesus cambio spiritual grandi a tuma luga den bida di e ser humano.

Pero ta bon pa tur hende sa dicon nos ta celebra, e motibo y grandesa di nos Salbador , kende a trece salbacion pa tur esunnan cu ta kere den dj’E.

P’esey Señor mes lo duna boso un señal. Mira un birgen lo sali na estado y lo haya un yiu homber, y lo dun’E e nomber Emanuel.( Isaias 7:14).

Pasobra un yiu a nace pa nos,un yiu homber ta duna na nos, y e gobernacion lo ta riba Su schouder.

Su nomber lo ta: Consehero Maraviyoso, Dios Todopoderoso, Tata Eterno, Prins di pas. Lo no tin fin na e aumento di Su gobernacion y di pas, riba e trono di David y su reino,pa establece esaki y mantene cu huicio y husticia, for di e tempo ey y pa semper. E zelo di e Señor di ehercitonan lo haci esaki.(Isaias 9:6+7).

Anto un spreit lo sali for di e troncon di Isai, y un rama for di su reisnan lo carga fruta. Spirito di Señor lo keda riba dj’E. E Spirito di sabiduria, y comprondemento, e Spirito di conseho y poder, e Spirito di conocemento y temor di Jehovah. ( Isaias 11:1+2). Profeta Isaias a profetisa tur esaki, di e nacemento di Hesus mas o menos 750 aña prome cu Hesus a nace.

Ma abo Bethlehem Efrata, mucho chikito pa ta entre e famianan di Juda, for di abo lo sali Uno pa Mi, pa ta un Gobernante na Israel. Su origen ta for di hopi tempo pasa, for di e dianan di eternidad.(Mikeas 5:2)

Y tur esaki a keda confirma ora e angel Gabriel a anuncia na Maria, con Spirito Santo lo baha riba dje y asina Hesus lo a bini na mundo. ( Lucas 1:26-56). Y Elisabeth prima di Maria a wordo yena cu Spirito Santo y a haya revelacion di Dios cu ta Señor Hesus ta den barica di Maria.( Lucas 1:41-45)

Ma ora e plenitud di tempo a yega , Dios a manda Su Yiu,naci di un muhe, naci bao di Ley, pa e por redimi esunnan cu tabata bao di Ley, pa nos por a ricibi adopcion como yiu.( Galationan 4:4-5).

Pasco di Nacemento di nos Señor Hesus mester haya e luga bek den nos curason.

Laga nos tur uni como Famia pa celebra Pascu di Nacemento di nos Señor Hesus, no den bochincha, accidente, tiramento, violencia domestico, hortamento, odio , vengansa, y falta di pordon, pero cu pas den nos curason, compartiendo nos amor y bondad cu otro.

Pasobra esey ta e berdadero boluntad di Dios.