Pastoor Marcel Balootje: Den nomber di Cristo Hesus, tur scuridad mester bay

Colosensenan 1:13 ta bisa: Pasobra E a libra nos di e poder di scuridad, y a hiba nos pa e reino di su Yiu stima. Efesionan 5: 8 ta bisa: Pasobra antes boso tabata scuridad, m’a awor boso ta luz den Señor, cana como e yiunan di luz.

Romanonan 8:14 ta bisa: pasobra tur esunnan cu ta wordo guia door di e Spirito di Dios eseynan ta yiunan di Dios.

Hechonan 26:18 ta bisa: Pa habri nan wowo pa nan por bira for di scuridad na luz, y for di dominio di satanas na Dios, pa nan ricibi pordon di pica, y un herencia entre esunnan cu a wordo santifica pa medio di Fe den Mi.

Efesionan 4:27 ta bisa: No duna diabel oportunidad. Nos tur sa cu tur e bebemento e coremento di auto iresponsabel, bringamento, maltrato, droga etc. tur ta bini for di e mundo di scuridad. Y a yega e momento pa nos busca cara di Dios, y laga nos uni den oracion, pasobra union den oracion ta obediencia na Dios (Mateo 18:19+20).

Pasobra e scuridad ta avansando tur dia mas y mas, y den nomber di Cristo Hesus e cosnan aki mester wordo para, pasobra ta forsa di maldad y scuridad y Cristo Hesus a bini aki na mundo pa core cu podernan di scuridad y trece nos tur na Su luz.

E asunto ta mas serio cu nos ta kere, ora nos mira tur e cos aki como custumber, ora nos ta mira muchanan ta bringa y nos ta bisa ta cos di baldadi, pero pa e muchanan e ta un reglamento di cuenta. Pregunta ta tur locual cu nos ta mira ta pasa bao di hubentud, nos por considera e cosnan aki como e echonan di mucha baldadi?

Criminalidad, e mortonan ta cay den trafico, of hende herida, te ainda nos wowo no ta wordo habri cu scuridad ta avansando y cu nos tin cu persevera den oracion? Cuanto tempo mas nos lo sigui celebra fiesta satanico, cu ta trece desaster den pueblo. Te ki dia hende lo compronde cu Dios ta luz y cu den dj’E no tin nada, nada di scuridad?

Cuanto bida mas mester bay perdi prome cu nos por realisa cu alcohol y droga, no ta amigo di ningun chauffeur? Cuanto tempo mas hende lo keda kere den mentira di diabel y desobedece Dios?

Den nomber di Cristo Hesus nos ta reprende tur poder satanico, tur forsa di scuridad, tur maldad, tur locual cu ta negativo for di riba e poblacion aki specialmente locual ta ataca nos hubentud. Y nos sa cu Cristo Hesus a bini pa derota tur locual ta maldad.

Señor laga cada hoben compronde cu nan no ta esclavo di e enemigo, cu nan bida ta hopi importante, cu nan ta stima pa nan mayornan, y cu Dios ta desea pa nan tur yega na conocemento di su palabra.

Ban stop di duna oportunidad na diabel, ban stop di haci cosnan cu nos sa masha bon cu no ta cumbini nos, no lubida cu mesun cara cu bo tin awe lo bo tin mañan cu Dios kier. No kere cu bo ta spirito, bo ta hende y comporta bo nechi manera hende.

Tata nos ta pidi bo den nomber di Cristo Hesus pa laga Bo angelnan campa rond di e isla aki y habri wowo di tur habitante, pa nan acepta Cristo Hesus como Rey y Señor di nan bida y den nan hogar.