Parlamento di Aruba, Corsou y Sint Maarten cu tripartiet na Hulanda

E siman aki na Den Haag, Hulanda tin varios reunion di Interparlementair Koninkrijksoverleg (IPKO). Prome cu duna inicio oficialmente na IPKO e delegacionnan parlamentario a reuni na Mercure Hotel pa asina fiha posicion hunto riba varios tema di importancia entre otro geschillenregeling, situacion cu Cft/RAft y futuro di e  relacionnan den Reino. Atardi a sigui e reunion di tripartiet rib’e tema di enseñansa. Tin preocupacion p’e studiante cu ta bin for di e islanan Caribense ta haya nan mes den reto pa haya un apartament. Pa finalisa, e delegacionnan a repasa propuesta di e Rijkswet Koninkrijksgeschillen y fiha posicion hunto.

Presentacion Raad van State

E mainta di e tripartiet a habri cu presentacion di Raad van State su representantenan di e islanan den Reino; Aruba, Corsou y Sint Maarten. E tres miembronan di Raad van State pa e islanan ta duna conseho for di e perspectiva di e islanan autonomo den Caribe.

Paul Comenencia, miembro di Raad van State pa Corsou a splica amplio di e rol di Raad van State riba su mes, pues e organo ta encarga di duna conseho riba diferente aspecto legislativo. Algo cu a resona den sala ta cu Aruba, Corsou y Sint Maarten tin di enfoca pa splica bon unda tur tin reto den e islanan mas miho na e comunidad Hulandes y pakico e situacion ta asina.

Hopi biaha tin diferencia di opinion entre partner den Reino Hulandes. Tin un procedura estableci caba como ta anda cu diferencia, ehempel duna entre otro e diferente impasse cu tin riba tema financiero basa riba e Rijkswet financieel toezicht.  Ma­ria van der Sluijs-Plantz miembro di Raad van Staten pa Sint Maarten a splica cu e islanan tin di  bin cu argumento bon funda ora yega bati na porta di Raad van State.

Mildred Schwengle miembro di Raad van State pa Aruba a enfoca su presentacion durante e charla di apertura di e tripartiet riba cambio climatico. Hoge Raad den e sentencia di Urgenda (fundacion cu ta promove desaroyo sostenibel na Hulanda) a subraya preocupacion riba aumento di nivel di lama, destruccion di eco sistema. Tin miedo den Reino Hulandes cu tur esaki por causa un crisis nunca antes bisto y eventualmente lo por tin violencia. Con e paisnan den Reino hunto lo mitiga e efectonan ta un prioridad. A yega ora pa tene cuenta urgente cu cambio den nos medio ambiente no por keda man crusa y kere cu esaki lo no tin efecto pa turismo y finalmente economia di e islanan di Caribe Hulandes.

Bon representa

Aruba ta representa pa un delegacion grandi na Hulanda. Fraccion MEP ta conta cu mas parlamentario presente si compara cu tur otro fraccion; Edgard Vrolijk, Shailiny Tromp-Lee, Alvin Molina, Setty Yarzagaray y Hendrik Tevreden ta representa e partido mas grandi den coalicion. Fracion Raiz tin Misha Raymond presente. Di oposicion pa e fraccion AVP tin Gerlien Croes, Arthur Dowers y Ryçond Santos do Nascimento presente. Fraccion MAS representa pa Marisol Lopez-Tromp y Fraccion Accion 21 ta conta cu presencia di Miguel Mansur.

E reunionnan di IPKO mes ta cumisna diamars mainta na Eerstekamer unda tur presidente di Parlamento lo hiba palabra despues lo pasa over pa Tweedekamer unda lo hiba diferente debate te cu diabierna.