Parlamento a laga nos na berguensa

Ta parce cu lider di fraccion di MEP a bay cu un discurso skirbi pa e lesa den Eerste Kamer na Hulanda durante apertura di e reunionnan di IPKO. E ta representa e fraccion di MEP, e fraccion di mas grandi (9 asiento) den Parlamento di Aruba. Pero na dado momento ora cu el a caba di lesa loke el a bin cu ne skirbi, a hacie pregunta separa, riba cual e mester a contesta cu su propio palabranan.

Ey a nota un diferencia di anochi cu di dia den e dominio di e idioma Hulandes, den loke a lesa y locual a contesta na e miembro di Parlamento Hulandes. Tabata parlamentaria Jorien Wuite di e fraccion di D66 cu a puntra e Miembro di Parlamento di Aruba, Shailiny Tromp-Lee (MEP), kico e ta haci pa controla Gabinete Wever-Croes. E pregunta a surgi pasobra e parlamentarionan cu ta sostene gobierno, Edgard Vrolijk y Shailiny Tromp a elabora riba e mesun topico, esta e encolvimento di CAft den maneho di gobierno. Nan ta sinti cu CAft ta mete den decisionnan politico y aunke IMF y otro organisacion mundial ta elogia (supuestamente) e maneho financiero di e gobierno aki, cu toch CAft ta sigui castiga Aruba pa tuma mas medida.

Consecuentemente, e parlamentaria procedente di Sint Maarten pero cu ta den Parlamento di Hulanda, a puntra su colega Shailiny Tromp, kico Parlamento di Aruba mes ta haci pa pone presion riba Gobierno pa nan ehecuta e reformanan cu nan mes a acorda den e protocol cu Gobierno di Hulanda ora a fia placa den pandemia. E kier tabata sa si e parlamentarionan a pusha pa bin cu trayectonan di ley pa controla gobierno y haci tur posibel pa tene e gobernantenan skerpi riba e acuerdo pa drecha e situacion financiero-economico di Aruba.

Riba esaki e parlamentaria di Aruba, a admiti publicamente den Parlamento Hulandes, cu tenawe ainda Gabinete Wever-Croes II (MEP-Raiz) no a presenta ningun reforma oficial na Parlamento. El a bisa acerca cu riba varios tereno tin trayectonan di reforma canando pero den un fase di preparacion, nada concreto ainda. Pero cu si a bin cualkier iniciativa di Parlamento di Aruba mes pa controla Gobierno y empuha e trayecto di reforma, el a bisa cu no tabatin nada….”helaas niet”.

For di e delegacion di Aruba, esta e parlamentarionan di oposicion, nan a critica e discurso y e contenido di locual tanto Vrolijk como Tromp a hiba den Eerste Kamer na Hulanda. A sigura cu, papia su malo papia su bon, tempo di Presidente di Parlamento mr. Ady Thijsen, tabatin mas transparencia y tabata duna participacion pa e delegacion ta riba e mesun liña di pensamento y opinion riba temanan comun y general. Pero cu Edgard Vrolijk ta practica un presidencia estilo dictatorial y no ta promove participacion. Ta pesey nan no ta para tras di locual Shailiny Tromp a lesa eyden, cu probablemente coordinadornan di Gobierno a skirbi pe den un bon Hulandes.

E mesun Presidente di Parlamento, mr. Edgard Vrolijk a sigura cu e lo a trece e asunto aki di un forma completamente diferente den Parlamento di Hulanda. El a admiti cu si tabata e nan a puntra, cu e lo a contesta ful otro cos, pero a laga locual Tromp a bisa eyden pa su cuenta.

Por lo menos un sindicalista, Josephine Albertus, presidente di sindicato di maestronan di scol, SIMAR, a considera e locual a sosode ayera na Den Haag como un berdadero “brevet van onvermogen”. E sindicalista cu a anuncia su retiro pa motibo di lo muda pa Boneiro no por a sconde su frustracion con nos politiconan ta laga nos cara na berguensa cerca Madre Patria. Pa e relato completo lesa TREMPAN