Parlamentario Shailiny Tromp-Lee (MEP): Atencion pa mehora y proteha derechonan di consumidor

Den e discurso di Gobernador en conexion cu Apertura di Aña Parlamentario Nobo el a duna atencion special na e consumidor. Gobernador a enfatisa cu economia ta toca nos tur y cu p’esey desaroyo economico mester aporta na calidad di bida di nos tur como ciudadano. El a sigui indica cu pa  e motibo aki mester tin debido atencion pa mehora y proteha derechonan di consumidor, segun lider di fraccion di MEP, parlamentario Shailiny Tromp-Lee.

Gobierno di Aruba lo institui Aruba Fair Trade Authority cu lo mester aporta na un clima di competencia husto, cu lo desemboca den miho calidad di servicio, calidad di producto y prijs mas husto pa e consumidor. Algo cu mirando e situacion actual na Aruba y rond mundo, sigur ta sumamente necesario y importante. Den e aña parlamentario tras di lomba, despues di hopi aña di problematica di fiansa y interes excesivo, Parlamento a aproba e ley cu ta regla e credito di consumidor. Manera treci padilanti pa Gobernador actualmente e ley ta den implementacion unda ta bay crea tambe un sistema di registracion di credito. Banda di esaki pa proteha e consumidor a lansa un campaña di Educacion Financiero pa yuda finansa den hogar. Pa asisti den esaki lo fortifica e departamentonan concerni pa ta e bos y defensor di e derechonan di e consumidor. 

E problemtica di finansa ta uno grandi den nos famianan. “P’esey mes mi ta aplaudi e campaña aki. Nos mester sigui traha pa fortalece e fundeshi di nos famianan. Haci esaki mas fuerte y solido. Sigur den e situacion di reto continuo aki nos mester sigui enfoca riba nos famianan y un calidad di bida digno pa cada un di nan,” ta loke parlamentario Tromp-Lee a bisa por ultimo.