Parlamentario mr. Edgard Vrolijk (MEP): Ley di Ombudsman por bin dilanti pa comienzo di 2023

Durante un conferencia di prensa diaranson mainta, politico mr. Edgard Vrolijk a enfatisa cu tabata papiando como un parlamentario y no como e presidente di Parlamento ora cu el a papia di leynan cu el pusha for di hopi tempo caba. Un di eseynan ta e ley di Ombudsman cu tin un trayectorio largo desde 2014 ora cu a present’e den Parlamento. A dura seis aña prome cu a pasa e ley. Aña pasa a purba di hinc’e den constitucion y hacie un hoogcollege van Staat, pero votonan contra di e mocion ey a destrui e proceso y stroba su ehecucion.

Como parlamentario responsabel pa cu pueblo, mr. Vrolijk a bisa cu el a tuma e iniciativa pa trece cambio di ley. E siman aki por fin nan a keda cla, pa cual e ta gradici departamento huridico di gobierno cu a yuda enormemente den esaki. Sarcasticamente Vrolijk a bisa cu e ley parce un baby den bariga di mama cu ningun politico kier a lag’e sali. “Si nos lag’e mas tempo, e lo sali cu lachi y ta cana y papia. A yega un ora cu nos mester laga e baby nace,” asina e politico a comenta.

Un di e cambionan mas primoridial, segun mr. Vrolijk, ta e discusion entre nombramento y retiro caminda ta pidi pa tin voto di dos tercer parti. “Esey ta algo cu den Reino no conoce; unicamente ta conoce cu bo ta nombra y kita cu mayoria. Den dos tercer parti hamas lo logr’e. Mi ta spera den un futuro, kisas ora nos no t’ey, esunnan cu bin despues por tin e madures politico, hancr’e como College van Staat den nos constitucion. Pero pa aworaki bo tin cu cuminsa haci posibel cu e Ombudsman ta bira realidad pasobra pueblo ta pidi p’e,” asina e parlamentario a expresa.

Pa e relato completo, lesa edicion di TREMPAN