Parlamentario kier stop pueblo di core iresponsabel

Recientemente den mi ultimo rueda di prensa, mi a anuncia cu mi ta trahando hunto cu colega Alvin Molina riba e ley di iniciativa di “Roekeloos Rijden.” E iniciativa di e ley aki nos a tum’e over for di ex-parlamentario Rocco Tjon y Sue-Ann Ras, kendenan actualmente ta trahando den gobierno. Nos ta haciendo algun trabao mas riba e ley aki pa despues e por sigui su proceso y nos ta spera di por brinda esaki pronto na Parlamento di Aruba. Den e ley ta splica varios aspecto kico ta “roekeloos rijden,” cu na Papiamento nos por traduci den “coremento peligroso” of “coremento di vehiculonan di un forma iresponsabel.” Recientemente nos por a wak con un señora a perde su bida pa via di coremento iresponsabel di un hoben. E accidente aki a causa un gran consternacion y tristesa den pueblo. 

E ta p’e motibo aki cu nos kier introduci e ley aki cu lo duna hues e recursonan necesario pa por dicta sentencia mas fuerte contra esunnan cu ta pone nos careteranan na peliger y ta core di un forma iresponsabel. Na Hulanda e ley aki ta den funcion basta aña caba y cu bon resultado. Tin menos accidente causa pa coremento peligroso y den caso cu esakinan sosode, castigo fuerte ta cay contra di esunnan cu ta kibra ley.

Den pasado varios coremento peligroso a termina den accidente grandi y cu morto den trafico. Hopi biaha esunnan cu a causa esaki no ta haya mucho tempo cera. Nos leynan actual no ta duna mucho luga pa castigo fuerte den e aspecto aki. Awo cu e ley di iniciativa di “roekeloos rijden” esaki lo cambia. Di e forma aki tambe tur esunnan cu ta subi careteranan di Aruba ta adverti cu e consecuencianan di maneho peligroso y iresponsabel lo cambio pronto. Laga nos tene bon na cuenta ki ora nos subi tras di stuurwiel nos mester respeta reglanan di trafico como debe ser y ta prudente ora di core auto. Haciendo esaki nos ta scapa bidanan y nos ta promove trankilidad y pas na Aruba.