Parlamentario Alvin Molina (MEP): Haime Croes di DIP mester duna cuenta!

“Awo cu nos ta cambiando nos strategia nacional, buscando mas stabilidad economico, construyendo mas pilar pa carga nos comunidad, nos Departamento di Infrastructura ta indespensabel y mester funciona optimal. Lastimamente hopi proyecto, di agricultura, horeca, deporte, vivienda, ta stagna pa via di un mal servicio duna door di DIP. E causa di tur esaki a cuminsa hopi aña pasa. Den casonan andando den corte por compronde cu riba nivel politico, maneho y procesonan, varios cos a bay robes pa cu otorgamento di tereno na Aruba”, asina parlamentario di Fraccion di MEP den parlamento, Alvin Molina, a vocifera awe. Un declaracion pisa, pero e tin algun siman caba ta atendiendo e tema di DIP, sin cu Gobierno ta sali pa contradeci of hustifica e maneho cu tin eyden ultimamente.

No ta custumber cu un parlamentario ta sali ataca un hefe di departamento directamente, pasobra e ultimo no por defende su mes. Mayoria bes ta ataca y cuestiona e minister politicamente responsabel pa e departamento y laga e cuestiona e director. Pero den e caso aki, e politico responsabel pa maneho di Directie Infrastructuur en Planning (DIP) ta nos minister-president cu alabes ta lider di partido MEP. Ta comprendibel e ora cu e parlamentario ta scoge pa salta e ruta politico y bay directamente na e ambtenaar y cuestiona su capacidad di maneho seriamente.

Relaciona cu e echo cu na DIP terenonan no ta saliendo y ta sinti cu no ta procesando nada debi cu tin investigacion penal andando eyden, tin e parlamentario disgusta. “E mesun situacion aki tin trahadonan di DIP cu miedo pa nan haci nan trabou, cual tin su efecto riba e servicio cu nan ta desea di duna pueblo. Pa nan tambe un solucion mester bin pronto. Lastimamente ta nada inusual cu tin investigacion andando den departamentonan gubernamental. Nunca un diensthoofd a instrui su coleganan pa stop di brinda servicio na pueblo di Aruba. Cu ki derecho DIP ta paralisa ful nos pais di desaroya? Como director bo no tin e luho di sinta warda pa otro bin cu e solucion con pa scapa bo departamento, bo coleganan y e futuro di Aruba”, asina e parlamentario a skirbi den su relato di prensa.

Un bon ehempel, Minister di Finansa y Cultura a hereda un debe gigantesco, ningun entrada, deficit 1000 miyon florin. El a lora manga, organisa su team, a logra un surplus di 63 miyon florin! MinPres a duna cara tur dia na su pueblo, splicando cada paso cu e ta tumando, tur decision, hasta esunnan no popular, pa awe nos ta na caminda pa sali for di e crisis mas grandi den historia di Aruba. Den un funcion bo ta carga un responsabilidad pa bo trabou y bo ta wordo confia cu un sierto autoridad.

“Na final bo mester duna cuenta pa e resultadonan. Un funcionario cu un funcion asina clave pa Aruba por desaroya, no mag nenga pa funciona, no mag nenga di duna cuenta na su minister y mucho menos na parlamento. Pesey durante tratamento di presupuesto mi a haci un peticion na minister pa pone e funcionario aki funciona. Si esey no ta posibel, pone un hende cu si por carga e responsabilidad pa pueblo di Aruba”, di acuerdo cu Parlamentario Alvin Molina.