Parada di Arco Iris Kleuter school t’ey bek: Celebracion di Dia di Rey riba bicicleta

Diaranson mainta por a mira y scucha un grupo grandi di mucha chikito riba bicicleta dorna na blaas. Ta trata aki di e celebracion di Dia di Rey di Arco Iris Kleuter School. Pa algun aña, mas tanto pa motibo di pandemia e actividad aki no tabata tuma luga mas, pero e aña aki nan no a keda atras.

Preparacion a cuminsa tempran y a haya instruccion pa un biaha mas pone e actividad aki bek riba pia. E klasnan a haya diferente color di blaas pero pa hunto nan forma e color di e bandera di Hulanda, sin lubida e color oraño cu tambe ta identifica den e celebracion di e dia festivo aki.

A combersa un rato cu juffrouw Nyree Hart cu tabata den ambiente y contento di mira e actividad aki un biaha mas riba caminda. Ta calcula cu lo tin aproximadamente 135 mucha cu a forma parti di e celebracion di awe, mayoria riba bicicleta y algun den bus.

Cu permiso di polis, a subi ruta den verboden pa tuma De La Salle, Verbindingsweg direccion Vondellaan pa despues bira den George Madurostraat y bira bek riba Adriaan Lacle Boulevard pa asina bay direccion bek scol.

Pa locual ta trata e exito di e evento aki, e cabesante di Arco Iris Keuter school  Nelly Orman- de Cuba, a indica cu ta danki na tur cu a duna un man pa esaki. Tanto juffrouw como e mayornan cu a traha duro un biaha mas pa logra pone tur e muchanan riba bicicleta pa asina nan por a disfruta di e dia di celebracion en grande.

A tene na cuenta tur detaye, hende ekipa pa atende cu cualkier emergencia, un bus cu a compaña e bike tour si acaso e muchanan cansa y hopi boluntario (mayor) pa asina cuida y anima e participantenan chikito di awe. Un dia placentero cu sigur caba mucha a disfruta enormemente di dje. Pabien na Arco Iris Kleuter school pa un evento bon organisa.