Pakete di compensacion ta alivia esunnan cu entrada mas abou

Como director di Departamento di Impuesto, mr. Luenne Gomez-Pietersz a admiti cu cambio di impuesto semper tin un efecto riba inflacion. Relaciona cu esey, e Plan Fiscal 2023 ta bin tambe cu un pakete di compensacion cu ta beneficia e contribuyentenan cu entrada mas abou, entre nan e pensionadonan.

“E ahuste den e tarifa di BBO cu 1% ta trece un inflacion di 1.4% di efecto den prijs,” asina e director a bisa. “Tin un pakete di compensacion cu ta bay man den man pa asina por alivia e peso extra di impuesto cu lo tin un efecto riba cada contribuyente.”

E compensacion pa contribuyente individual ta encera cuta baha e tarifa den e prome dos categoria di impuesto riba entrada cu 2%. Fuera di esey, ta aumenta e suma liber di impuesto pa tur contribuyente individual y empresa chikito (eenmanszaak) di 28.861 pa 30.000 pa aña.

Mr. Gomez-Pietersz: “Esaki ta nifica cu 30.166 contribuyente no ta bay paga inkomstenbelasting pasobra nan tin un entrada bou di 30 mil florin cu ta e suma liber di impuesto. Esey ta representa 60% di nos forsa laboral.”

Cobransa di impuesto riba entrada di pension di behes di SVB; ta bay paga impuesto apart. E director di DIMP a duna un ehempel di kico ta e impuesto riba entrada di pension di behes cu ta bay cobra un persona cu tin un salario di 36 mil florin pa aña, mientras cu su señora tin un pension di 10.455 florin pa aña. Hunto, esey ta 46.910 y te cu awo tabata aplica, entre otro, e suma liber di impuesto y asina ey tambe e impuesto cu ta cobra ta 3.655. Sinembargo, cu e cambio di ley, e pareha aki ta ‘in de heffing betrokken’, kier men e meneer y e señora ta paga nan impuesto apart. E meneer so ta paga 1.645 florin, esta 1.720 florin menos.

Pa e relato completo, lesa edicion di TREMPAN