Pais sin perspectiva: WEB y Elmar kier nos spaar pa nos keda mesun caminda

Fraccion di AVP a reacciona riba e anuncio di WEB y Elmar cu nan ta aumenta e prijs. Por mira cu esaki ta un pais sin perspectiva. Kier pa spaar, pero keda mesun caminda.

Mr. dr. Ryçond Santos do Nascimento, parlamentario di AVP, a indica cu costo di bida ta caro caba. Cuminda y transporte ta caro, y awo tanto awa como coriente ta bira mas caro. Nan ta bira significantemente mas caro. Consecuencia di esaki no ta solamente cu na final di luna un hende tin menos placa, pero e tin su impacto.

E parlamentario a indica cu mester papia cu polis, incluso e sindicato di polis, lo bisa esey pasobra e ta un impacto social directo. E tin impacto riba criminalidad, impacto riba cuido di mucha, impacto di pleito den e hogarnan pasobra ora tin menos placa e stress ta mas halto. E tin un impacto grandi riba e comunidad y esaki ta completamente pa consecuencia di metemento politico den e companianan di utilidad.

Esaki ta bin pa motibo cu gobierno no kier a hedge. Na december nan tabata sa, nan a haya señal hopi duidelijk di WEB. Nan no a hedge y p’e motibo ey WEB ta den cora. Esey ta significa cu nan a gasta tur nan reservanan. Nan a pasa den tur y gasta mas cu 120 miyon, probablemente den careda di 150 pa 170 miyon di florin. Pa mas lesa TREMPAN.COM.