News

Pago pendiente di artista i músiko nan pa evento di homenahe póstumo na Ced Ride

Na: Minister di Ensenañsa, Siensia, Kultura i Deporte.

Sr S. van Heydoorn

World Trade Center

 

Willemstad 1 desèmber 2022

 

Tópiko: Pago pendiente di artista i músiko nan pa evento di homenahe póstumo na Ced Ride

 

Honorabel sr. van Heydoorn,

 

Un representante di músiko nan ku a partisipá na e evento di homenahe póstumo na Ced Ride dia 10 di òktober 2022, a tuma kontakto ku mi persona i puntra mi si mi por yuda intervení komo te dia di awe 1 di desèmber, o sea kasi dos luna despues, artista i músiko nan no a risibí pago pa nan partisipashon na e bunita evento aki.

 

Un evento por kual nan mester a hasi vários ensayo pe. Esaki a wòrdu hasi ku hopi dedikashon, amor i rèspèt.

 

Pa e motibunan ariba menshoná, konforme artíkulo 96 di Reglamentu di Òrdu, suskrito ta puntra Minister di ESKD enkaresidamente pa por fabor kontesta di forma urgente e siguiente pregunta:

 

  1. Ki dia Ministerio di ESKD lo paga e artista i músiko nan ku a partisipá na e evento di 10 di òktober 2022? Mi ke urgi ministerio pa hasi e pago aki unu di prioridat.

 

Ta hopi lamentabel ku un evento asina bunita awor ta karga e konsekuensia aki.

 

Tambe mi ke urgi Ministerio di ESKD i Ministerio di Finansas, pa den futuro ora tin un evento pa kual tin ku kontratá artista i músiko nan, pa e proseso bai di un manera mas efektivo den kual por garantisá un pago mas lihé ku ta posibel.

 

Sperando di a kontribuí positivamente i sperando un pronto reakshon,

 

Atentamente,

 

 

Steven Croes

Frakshon di PAR

 

Share this page to TelegramShare this page to Telegram