Pa scapa cara di famia: Yiu di minister-president ta reta husticia

E no ta un caso cu ta sosode tur dia, pero Kevin Wever, yiu di minister-president mr. Evelyn Wever-Croes, via bufete di abogado Croes, Wever & Ruiz, a opta pa reta Procurador General y Ministerio Publico di Aruba, relaciona cu e citacion cu a saca pa un caso penal. Ta acusa Kevin Wever, como un sospechoso di husticia, pa presenta den e caso penal pa bringamento y destruccion dia 14 di november 2021 na Gusto Cafe y Azia Restaurant. Pa evita cu e mester presenta dilanti hues, a opta pa bay den “bezwaar tegen de dagvaarding” na Corte Comun di Caribe Hulandes.

Dentro di poco tres hues di Hof lo manda yama PG y Kevin Wever padilanti pa scucha nan argumentonan dicon e huesnan mester destrui e citacion. E tipo di casonan asina ta masha inusual y casi nunca ta sosode pasobra e chens pa gana ta limita. Pero pa Wever, e consecuencia di perde su trabou y pa su mama haya un sla politico pa falta di integridad den cas, ta haci cu e ta dispuesto pa tuma e chens toch. Un fecha pa tratamento di e caso aki no tin ainda. Mientrastanto e hues penal den e caso cu mester tuma luga dia 10 di november 2022, a dicidi di pospone e caso te ora bin claridad den e protesta entama door di Wever. Na otro banda tin tres sospechoso mas, entre nan, dos yiu homber di Michael Williams di Pueblo Prome. Nan a nenga di acepta un “deal” pa e caso no sigui den corte y “settle” den un Tom-Zitting. Nan kier e caso bay dilanti hues, pasobra nan ta convenci di nan inocencia.

Tin chens cu Hof lo trata e caso asina cu siman habri, pa evita cu mester pospone e caso di dia 10 di november ainda. Kevin Wever ta un Security Guard na aeropuerto, pues un status di “sospechoso di husticia” lo hinc’e den basta problema na trabou. Pa e relato completo, lesa e edicion di TREMPAN di mañan.