Pa recauda fondo: Mary Joan Foundation y Shoco Legends Aruba ta organisa Pink Bike Ride

Mary Joan Foundation y Shoco Legends Aruba a uni hunto un biaha mas pa asina organisa e Pink Bike Ride. E evento aki, cu ta uno di recaudacion di fondo, ta tuma luga dia 6 di november proximo.

Stella Vrolijk, secretaria Mary Joan Foundation, a indica cu e bike ride ta cuminsa pa 4:00 pm y ta sali fo’i Urataka. Mary Joan Foundation ta agradecido cu Shoco Legends a acepta un biaha mas pa forma parti di e evento aki. Aña pasa tabata prome biaha cu a organisa Pink Bike Ride. E ride aki ta un recaudacion di fondo pa asina e fundacion por logra su meta di aña.

Andre Geerman, vice-president Shoco Legends Aruba, ta invita tur motociclista, no di Harley so pero hasta esunnan cu tin scooter, quard, pa participa. Pero mas cu claro cu nan ta stuur consciente cu nan y bisti helm, pasobra siguridad ta prioridad. Pa loke ta trata e ruta, segun Geerman, esaki ta cuminsa na Urataka Center y ta pasa den Santa Cruz, despues ta bay direccion di Noord (area di hotel). E stop punt banda di Ling’s Restaurant. Aki tur hende ta haya snacksbox, boter di awa y despues di diescinco minuut di relaha e bike ride ta sigui. Despues di pasa den e area hotelero, e ride ta termina na Jungle Vibes, unda lo saca premio y DLS lo entretene nan.

Dia 13 di october di 5:00 pa 7:00 pm por pasa inscribi, unda Stella y Arabella lo ta eynan. Tambe por inscribi online, pero tin di tuma contacto cu Stella. E otro dia di inscripcion ta 27 di october di 5:00 pa 7:00 pm na Jungle Vibes.

Geerman ta recorda tur hende pa tin nan papel na ordo, pa coopera durante e bike ride. Mary Joan Foundation a acerca nan un biaha mas pidiendo sosten pa recauda fondo.

Vrolijk a indica cu tambe por registra na Mary Joan Foundation y por haya informacion di esaki riba nan pagina di Facebook. E prome siman di november tur dia nan ta eynan di 6:00 pa 8:00, mientras e otro dianan por wak riba nan Facebook. Prijs di inscripcion ta 25 florin y e motociclista ta haya pin di lintje (ribbon) y bandana como gradicimento pa participa.

Rosa van der Biezen, boluntario, ta pidi tur motociclista pa inscribi, pasobra no solamente esaki ta yuda e fundacion pero tambe cu Mary Joan Foundation a cumpli diescinco aña di existencia. Ta organisa e evento di recaudacion di fondo pa asina e fundacion por sigui yuda y brinda sosten na e persona cu mester di dje.