Pa prome biaha FAVI a celebra Halloween cu su clientenan

Diahuebs mainta Fundacion Arubano pa esnan Visualmente Incapacita (FAVI) a tene un celebracion di Halloween, specialmente pa su clientenan.

En bista cu e clientenan di FAVI ta personanan cu tin problema visual, sea nan no ta wak bon of nan ta completamente ciego, pa cual algun di nan tabata dificil pa nan a duna nan cooperacion. Pero tambe tabata tin e otro clientenan cu si tabata ful anima pa participa den e actividad aki. Charlene Marchena, Guia di Actividad na FAVI, a indica cu esaki tabata prome biaha cu FAVI a tene un celebracion di Halloween.

Semper un di su soñonan tabata pa tene un fiesta di disfraz cu e tema di Halloween pa y hunto cu e clientenan di FAVI y e aña aki, porfin esaki a bira realidad. Esaki tabata e ultimo actividad di Marchena na FAVI, ya despues di diesdos aña, e ta bandona FAVI.

En bista cu esaki tabata prome biaha cu FAVI a tene un celebracion di Halloween, Sari Wernet-Kelly, Terapista na FAVI bisa di ta contento cu e entusiasmo di e clientenan. Mas aleu, el a bisa cu e clientenan di FAVI ta gusta di ta den movecion. 

Un di e retonan cu FAVI tin actualmente ta cu nan guia di actividad ta retira di FAVI, nan ta spera di haya un persona pa na luga di Charlene.

Mientras tanto, ambiente ta sigui. Den luna di november nan lo tin diferente otro actividadnan y algun charla combina cu fiesta di Pasco como tambe un actividad di Karaoke den Pasco. 

Un otro actividad cu nan tin pendiente ainda ta Dare the Darkness, cu ta un di e ultimo actividadnan di e aña aki. Dare the Darkness lo tuma luga dia 24 di november, 1 y 2 di december. 

Dare the Darkness ta un experiencia culinario, un dinner pero den total scuridad. E menu no ta conoci pero esaki ta prepara specialmente pa e guests. Door di reserva un asiento pa e siguiente evento di Dare the Darkness, bo lo ta parti di un experiencia unico. Ta reserva te cu diesdos asiento pa anochi.

E ticketnan p’e evento aki ya caba ta obtenibel cerca e trahadonan di FAVI.