Pa henter dia no tin bus: Trahado di Arubus no ta acepta proposicion di gerencia

E trahadonan di Arubus a tene nan walkout cu lo dura 24 ora. E trahadonan no ta acepta e structura salarial cu gerencia a bin cu ne. Tur cos ta pega pasobra tabata negosha riba e structura salarial, di cual e gerencia a scoge pa esun di mas abou.

Gerencia a impone cu e trahadonan mester acepta e salario cu nan a bin cu ne, tabata palabranan di Patrick Dake, shop steward di Arubus. El a splica cu tur cos a pega y tabata den negociamento cu mediador. Gerencia di Arubus tabata esun cu a pidi pa mediador interveni. Tabata negocia e structura salarial cu Arubus a impone riba e trahadonan pa tuma esaki, pasobra no tin otro manera.

A purba di negocia cu gerencia y a bisa cu no ta bay acepta e structura salarial mirando cu costo di bida ta birando caro. E trahadonan no por wanta mas, pasobra pa hopi aña nan a wanta e compania. Costo di bida ta subi y e trahadonan di Arubus no ta bay dilanti den salario. Nan tin dies of mas aña sin haya aumento.

E structura salarial cu gerencia a bin cu ne tabata cuater y nan a scoge esun di mas abou. SEPPA a busca pa bin cu algo husto pa tur trahado. Segun Dake, e opcion cu gerencia di Arubus a bin cu ne, di cual gerencia mes a bisa, ta 40 hende so ta bay dilanti, mientras e opcion di SEPPA tabata cu 70 hende ta bay dilanti. E trahadonan ta prefera e opcion di SEPPA, pasobra e ta mas husto. E punto dje trahado ta cu na momento cu gerencia kier impone cu loke nan a scoge ta bay door, nan no ta acepta esaki mas.

Walkout na Arubus: No tin bus pa henter dia di awe

Walkout na Arubus: No tin bus pa henter dia di awe. https://24ora.news/3VZcetJ

Posted by 24ora on Thursday, December 15, 2022

E trahadonan ta welga henter dia. Esey ta significa cu e linea di bus ta plat. Algun bus ta coriendo, pero ta e chauffeurnan contrata, pasobra esunnan cu ta traha pa Arubus no ta subi bus. Con e welga ta sigui, Dake a indica cu nan no ta bay divulga nada ainda. Pasobra loke nan kier ta pa sinta na mesa, dialoga y yega na un acuerdo cu ta cumbini e trahadonan.

Minister Ursell Arends a indica di ta dispuesto pa negocia y evita mas welga di Arubus. Segun Dake, e mandatario por bisa esey como bunita, pero tres luna pasa cu el a bisa di pasa cerca nan pa mira con cos ta, con e busnan ta. Pero te cu fecha di awe ainda e no a yega cerca nan.

Edwin Mohammed, kende ta director di Arubus, tabatin dos raad caba. E tin un auto Honda CRV gelease y tin diferente beneficio. Segun e trahadonan, ningun director anterior a lease un auto. Pa lease un auto esaki ta costa e compania 1,585.30 florin pa luna. A lease e auto desde 20 di februari 2020 y e contract ta termina dia 20 di december 2023.

Tambe ta gasta placa na Medworks, pero tambe tin SVb. Ora di AO e trahadonan mester meld tanto na Medworks como SVb, pero mester pasa prome na Medworks. Medworks ta esun cu ta tuma decision si e trahado tin cu bay SVb of no.

Antes Arubus tabatin diferente ruta, pero a cera algun di nan. E trahadonan ta haya cu por habri ruta nobo por genera mas placa. Un ehempel ta pa bay Baby Beach. Hopi turista kier yega Baby Beach, pero no tin un bus di Arubus cu ta yega eynan. Segun e trahadonan, nan ta perde placa aki. Awe den waf tin dos barco crucero y hopi turista ta haci uzo dje servicio di Arubus pa bay beach. Awe nan no lo haya bus pa bay banda di beach.

E chauffeurnan ta cuestiona e echo cu e director a duna ordo pa dos hende dos desconoci stuur bus di Arubus. Nan ta puntra con ta posibel cu ta laga hende aunke cu no tin un rijvergunning pa maneha bus di Arubus. Nan kier sa si un accidente sosode, ken ta para responsabel. 

Pa mas informacion Lesa mas den TREMPAN.