E no ta un secreto cu Aruba a bira caro, costo di bida ta casi impagabel y awo hasta pa bay scol ta un gasto grandi. Por corda ainda con den campaña, MEP a priminti cu enseñansa lo bira gratis na Aruba. Esey nunca a sosode, ni den nan prome gobernacion cu partidonan POR y RED y ni den e di dos cu partido Raiz.
Den e prome gobernacion, tabatin un minister bon studia pero cu no necesariamente tabatin un bon pensamento di dje. Den e di dos periodo, a apunta un ex-sospochoso di husticia como minister. Hopi tin duda den su capacidad y integridad como minister.
Aumento di schoolgeld na Colegio EPI
Antes studiantenan na Colegio EPI tabata paga alrededor di 450 florin pa aña na schoolgeld. Desde recien, manera ta conoci, EPI, e unico MBO scol na Aruba, a cuminsa cu un sistema nobo cu varios opleiding nobo. A renoba varios opleiding y bin cu varios nobo. Antes tabata brinda estudio riba nivel MBO 4 y MBO 3 pero awendia hasta ta brinda riba nivel MBO 5. E sistema nobo a trece cu ne cu e studiantenan tin cu dedica mucho mas tempo na ‘zelfstudie’.
No tur studiante a aprecia e cambio. Algun luna patras hasta un studiante a publica un video riba su plataforma di TikTok unda a cuestiona e sistema nobo di EPI. E video a haya hopi ‘views’ y reaccion. Hasta e director nombra politicamente pa Minister Endy Croes, esta Ankie Danker, a yama e studiante p’un reunion relaciona cu su publicacion.
Di 450 pa 2000 florin pa aña
Debi na e sistema nobo, awendia e studiantenan tin cu paga un suma inicial di 475 florin di schoolgeld y na banda di esey tin un gasto adicional di casi 1500 pa paga na licensia. Mayoria les, pa no bisa tur les, ta tuma luga via internet, pues e studiante mester di un laptop. Awendia, un di e laptopnan mas barata por cuminsa n’un suma di alrededor di 700 florin. Apart nan tin cu paga e suma di e licensia y tambe e schoolgeld. E echo ta cu, enseñansa a bira mas caro y no ta mira un sosten di parti gobierno pa yuda esunnan menos afortuna pa tambe por sigui den e ciclo di educacion intermedio, manera Colegio EPI.
Tocante Colegio EPI
Educacion Profesional Intermedio (EPI) ta situa den Venusstraat 3. E ta e unico instituto di enseñansa riba nivel MBO (Middelbaar Beroepsonderwijs) na Aruba. A funda Colegio EPI riba prome di augustus 1997. Ta ofrece educacion na nivel 3, 4 y 5 consistiendo di e unidadnan; Salubridad & Servicio, Economia, Hospitlaidad y Turismo y Ciencia & Tecnologia.
Na aña 2022 Colegio EPI a introduci 8 estudio nobo. Na tur por scoge entre 13 diferente estudio, manera: Allround medewerker Information Technology Systems and Devices, Expert Information Technology Systems and Devices, Elektrotechniek, Allround Assistant Business Services, Business Administration & Control Specialist, Certified Cook, Associate of Applied Science in Culinary Arts, Zelfstanding Medewerker Travel & Hospitality, Leidinggevende Travel & Hospitality, Associate Of Science Degree in Hotel and Restaurant Management, Verpleegkundige, Verzorgende y Social Pedagogische Medewerker.
Colegio EPI ta conta cu mas di 2000 studiante y mas cu 74% di nan ta logra termina nan estudio cu exito.
Comment