Otmar Oduber: PPA a celebra 75 aña di su fundacion

Dia 23 di october 1949 e visionario Juancho E. Yrausquin a funda Partido Patriotico di Aruba (PPA). P’esey e dirigente actual, e participantenan di PPA a bini hunto diaranson pa conmemora, pa pone krans y celebra 75 aña di existencia di PPA.

Otmar Oduber, lider di partido PPA, a expresa cu pa su persona tabata un honor cu a conmemora cu dia 23 di october 1949 a funda PPA. Yrausquin tabata un persona cu tabatin vision grandi pa Aruba, un persona cu a separa su mes fo’i un partido cu e tabata afilia na dje na momento cu el a sinti cu Aruba no tabata honra durante e bataya pa libera e pais aki.

Ta recorda Yrausquin como un persona cu a introduci Caribbean Hotel, y a ricibi critica e tempo ey. Pero awe ta pilar di pais Aruba. E ta un persona cu a logra hopi logro cu e partido PPA y a introduci pensioen pa e grandinan, p’e huerfanonan, duana, etc. Ta un trayectoria hopi grandi di un partido durante 75 aña. E partido tabata tin diferente lider, unda cu tabatin diferente epoca, diferente lider cu a carga e partido aki.

Den su gloria, PPA a goberna e pais aki pa binti aña consecutivo, unico partido cu a logra diescinco asiento den Parlamento di Aruba. Esey ta duna un refleho di un partido cu trayectoria no solamente largo, di exito, di programa presenta. Ultimo biaha cu PPA a drenta Parlamento di Aruba tabata haci pa e defunto Benny Nisbet. Despues tabatin otro lider cu a purba y awo Otmar tin e honor pa carga e partido aki.

Un partido cu e aña aki tin e mesun vision pa traha p’e pensionadonan, di cual ta e topico principal, ta carga e bandera principal pa duna contenido bek na e vision cu tabatin e tempo ey. Pa duna un bida husto y real n’e pensionadonan ta termina nan añanan di labor riba e isla. Pa duna e pensionado ey, na remedi, e servicio medico, duna nan e calidad di bida cu nan merece.

Oduber a indica di tin e honor di ta e prome minister cu a traha pa tin e hotel na San Nicolas, esta Secrets. Tin hopi momento cu e ta sinti elogio. Hunto cu su diescinco coleganan, ta un honor pa por carga e partido aki un biaha mas, pa hib’e un biaha mas na gloria manera tabata conoci den pasado, a base di e topiconan cu tabata fundeshi di e partido aki. E puntonan aki a significa cambio grandi den e bida di cada hende cu ta biba na Aruba.

Den su speech, el a bisa cu den e simannan aki e no a conoce hende cu a bisa cu den nan famia nan welo, bisawelo tabata PPA raha, cu tabata sostene e lucha aki. Ta mustra e grandesa di e partido aki y p’esey ta un honor pa su persona lidera e partido aki cu e mesun pensamento di Juancho. Tambe e lidernan cu a siguie pa unifica e pueblo aki, no ta importa di unda e persona a bini, ta forma parti di Aruba. Pa fortalece Aruba y hacie fuerte, unda cu division ta pasa pa pasado.