Ora goliat ta borota iglesia mester persevera den oracion

E historia di David y Goliat no ta un simpel historia, pero ta algo pa nos tene duro na dje awendia, cu ora nos tin fe den Dios, nos tin autoridad pa papia, y move den Su Nomber, pasobra Señor nunca lo bandona esunnan cu ta confia den dj’E (Isaias 26:3+4).

Den e historia aki tin tres Factor cu nos tin di tene debido cuenta cu ne;
Goliat tabata representante di e malvado, perverso, inmoral, representante di diabel,cu no tabata respeta Dios y a lanta contra e pueblo di Dios, y kier lucha contra nan y haci nan esclavo, pa asina nan keda bao di su dominio.

Saul tabata rey, representante di autoridad terenal, den un palabra bisa gobernante y henter su ehercito, no por a enfrenta e Goliat aki pasobra nan tur tabatin miedo di su haltura y e armanan cu e tabata carga. Ora Goliat papia so ,tur tabatin miedo (1 Samuel 17:11).

No tabatin un homber cu por a para su dilanti ,ni rey ni tampoco su ehercito por a enfrenta Goliat, ningun por a tuma un decision, ora nan tende su palabranan tur ta huy p’e y haya hopi miedo. Asina e pueblo a keda sin defensa (1 Samuel 17:24).

David su tata a mand’e bay wak con ta cu su 3 ruman hombernan cu tabata sigui Saul den e bataya .
David no tabatin experiencia militar, solamente e tin Fe grandi den Dios, pasobra Dios ayud’e vence Leon y Beer cu a bin ataca su carnenan, y David a enfrenta e animalnan feroz y a mata nan.
David a demostra y siña nos pa awe ora nos mira maldad ta avansa cu nos mester acerca e trono di Dios.
Y asina confia den Señor, pasobra solamente den nomber di Cristo Hesus nos lo tin e victoria.

Pero David a bis’e abo ta bini contra mi cu spada y speer, pero ami ta bini riba bo den nomber di Señor di ehercitonan, e Dios di ehercitonan di Israel kende bo a reta. Den 1 Samuel 17:46 David ta splica Goliat bon cla kico ta bay sosode cu ne riba e dia ey. Den nos bida nos por topa cu e Spirito di Goliat cu kier tuma dominio riba hende cu malesa,droga, alcohol,violencia, canamento cu arma etc.

Y awor mas cu nunca e Goliat di inmoralidad, ta borota , y purba di controla mundo, tira un bista rond di nos mes, cuanto ,adulterio, incest, abuso sexual, pedofilia, lesbianismo, homosexualidad,y sabiendo cu tur esaki nan ta contra boluntad di Dios y cu nan ta pica, y esunnan cu ta practica e cosnan aki lo no hereda e reino di Dios.(Galationan 5:19-21).
Toch hende ta busca tur manera pa inmoralidad wordo legalisa (1 Corintionan 6:9).( 2 Timoteo 3:1-5).

Mescos cu David a vence Goliat den nomber di Dios, e pueblo di Dios no por cansa di haci oracion, pa Dios tene misericordia, di tur esunnan cu ta laga diabel gaña nan.
Oracion ta core cu e Spirito di violencia. Oracion tin poder pa core cu inmoralidad. Oracion tin poder pa pone hende arepenti. Oracion tin poder pa ranca hende saca for di man di diabel. Oracion tin poder pa tumba cualkier fortalesa di maldad. Oracion ta obra pa Dios derama Su misericordia, pa asina pa medio di Su Spirito Santo e conviccion drenta den curason di hende pa nan por arepenti y aparta for di caminda di maldad.

Tur cos ta posibel pa esun cu tin fe, y cu ta determina den su curason, cu e kier rechasa inmoralidad, entrega su bida na Cristo Hesus y asina ricibi bida eterna.