OPPA: Nos ta duda cu e cambionan cu tin ta pa miho

Presidente di Organisacion di Pensionado Publico di Aruba (OPPA), Ivo Valdes ta wak cu poco speransa cu e cambionan cu Gabinete Wever-Croes ta bay implementa den e dianan proximo riba tereno fiscal, lo trece un cambio positivo pa e situacion di e poblacion, en particular pa esun di e pensionado.

E representante di e sector aki a cuminsa na bisa cu satisfecho totalmente no por ta nunca pasobra cambio ta tarda y, mientras cu tin aumento cu ya ta vigente, ainda mester bay wak con e grandinan lo por bay atende cu esey y otro na caminda.

Valdes a duna como ehempel, e pensionado cu solamente ta cobra di SVb. OPPA no ta wak ta di unda e persona aki lo por saca mas pa cubri tur e aumentonan cu tin. “Webo a bira caro, aros a bira caro, spam a bira caro; ta cosnan cu e ta obliga di cumpra pasobra tur otro cos ta demasiado caro. Riba dje, mester paga pa remedi,” asina a declara.

Basa riba esey ta kere cu den algun tempo, luga di baha, e gastonan di AZV lo subi ainda mas door di e malesanan cu lo bin door di e echo cu e poblacion Arubiano no por afford mas di come poco saludabel. “Nan no por yuda, pasobra nan no por otro.”

Pa conclui e secretario di OPPA a indica cu nan ta duda cu e cambionan cu tin lo ta pa miho.” Asina mes, Valdes ta spera  cu e situacion na Aruba por drecha otro aña, specialmente pa e pensionado cu “ta carga e sla cada bes.”