One Dirty Island: Esaki ta otro berguensa pa nos turismo

Ta increibel pa mira situacion asina na un pais turistico. E cantidad di sushi aki ta net unda ta baha boto na e Fisherman Hut na Malmok. Por bisa, pa defende e eror di esunnan cu mester mantene e luga limpi, cu esunnan cu a hiba co’i come y co’i bebe por a bay cu nan sushedad bek mescos a trece nan.

Mientrastanto despues di aña nobo unda hopi a gosa di e area aki aña nobo, hopi a bay laga nan sushedad atras. Dia cinco di januari 2023 ainda e sushedad t’ey. Cu otro palabra no tin un departamento cu ta encarga pa atende cu e sushinan na e barinan cu tin den henter e zona turistico.

Esaki t’e bunitesa cu e turistanan ta mira banda di loke Aruba ta promove como Fisherman Hut. Caha di vuurwerk, caha di alcohol y cuminda ta tur rond di e bari. Esunnan cu ta frecuenta e area diariamente ta recoge cierto sushedad cu biento ta manda pa lama. Ta spera cu pa diabierna e sushedad aki wordo recogi trempan y nos isla no pasa un berguensa como One Dirty Island na luga di One Happy Island.