Oficina di Turismo: Aruba ta bira e prome destino pafo di Hulanda pa traha cu QR-FIT

Oficina di Turismo, A.T.A., conhuntamente cu Minister di Turismo y Salud Publico, Minister di Educacion y Deporte, IBISA y QR-FIT a anuncia e prome ruta di QR-FIT na Aruba durante un conferencia di prensa.

Mirando e rol importante di A.T.A. den e maneho di destino, ta busca y encurasha semper un producto y un experiencia nobo pa nos bishitantenan. Algun aña atras, como parti di A.T.A. su strategia a delinea diferente area/“niche” turistico cu por uza pa atrae turista sin pone peso adicional riba nos capacidad. Un di e nichenan aki ta bienestar/ “wellness”. Specialmente despues di e pandemia e actividadnan cu ta enfoca riba bienestar a bira mas importante. 

Ya pa varios aña A.T.A. conhuntamente cu diferente socio a inverti den diferente area publico unda tanto turista como local ta haci ehercicio. Mayoria di e persona nan ta uza e areanan aki pa cana y core. Hopi biaha esunnan cu ta cana of core por tin falta di incorpora ehercicio cu ta fortalece nan musculonan. Pa e motibo ey e ekipo di QR-FIT a cuminsa cu QR-FIT na Hulanda. E meta ta pa facilita e ehercicionan cu ta fortalece musculonan, mientras ta haci uzo di espacionan publico y aire liber. 

E idea ta cu e usuario ta haci uzo di e QR-FIT app riba nan telefon pa asina haci e ehercicionan na e 12 puntonan riba e ruta di 2.5km. Por scoge e nivel di ehercicio y un video lo indica con e ehercicio mester wordo haci pa e nivel cu e usuario a scoge. Entre e diferente puntonan e usuario por cana of core, depende di su nivel fisico.

Aruba ta bira e prome destino pafo di Hulanda cu ta traha cu QR-FIT. A.T.A. ta contento di por ta parti di e proyecto aki y ta agradecido pa e sosten ricibi for di tur e socionan cu a traha duro pa por a logra concretisa e proyecto aki.