Oficina Central di Estadistica: Indice di prijs di consumo a registra un caida di 0.2% pa luna di september

E CPI pa luna di september 2022 ta 106.20, loke ta representa un caida di 0.2% compara cu e indice di augustus 2022 (106.43) y acumulando un subida di 5.6% te cu na september di e aña aki. E cambio di e CPI pa e ultimo diesdos (12) lunanan (september 2021 te cu september 2022) ta 7.0%, un subida di 4.8 punto di porcentahe (ppt) compara cu e periodo corespondiente di aña pasa (2.2%).

E promedio anual (ultimo 24 luna) di e tasa di inflacion pa e periodonan di September 2020 te cu september 2021 y september 2021 te cu september 2022 ta 4.7%, un subida di 5.4 ppt compara cu e -0.7% registra den e periodonan di september 2019 te cu September 2020 y september 2020 te cu September 2021.

Durante e luna aki, tres (3) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Transporte” (-2.8%) y “Mobilario” (-3.1%), causando un efecto di -0.40 y -0.28 ppt, respectivamente. 

E caida den e sector restante a contribui cu un efecto di -0.11 ppt riba e CPI di september 2022. E caidanan aki ta contraresta parcialmente door di principalmente subida den e indicenan di e sectornan di “Vivienda” (1.0%) y “Paña y sapato” (7.1%) cu a contribui cu un efecto di 0.25 y 0.17 ppt, respectivamente. E subidanan den e sectornan restante a contribui cu un efecto di 0.16 ppt riba e CPI di September 2022.

E caida den e sector di “Transporte” tabata causa door di un caida den e categoria “Gasto relaciona cu uso di vehiculo di transporte personal” (-5.2%), causando un efecto di -0.47 ppt. E caida den e sector di “Mobilario” ta causa principalmente door di un caida di 15.9% den e categoria “Mueble y accesorionan, tapijt y otro tipo di material pa vloer”, causando un efecto di -0.17 ppt. E subida den e sector di “Vivienda” a wordo causa principalmente door di un subida den e categoria “Mantencion y reparacion di vivienda ” (4.2%), causando un efecto di 0.21 ppt. E subida den e sector di “Paña y sapato” a wordo causa principalmente door di un subida di 8.5% den e categoria “Paña”, causando un efecto di 0.16 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu augustus 2022, 53.7% di e bienes y servicionan aki a conoce un aumento di prijs causando un efecto di 1.18 ppt, mientras cu 29.7% ta mustra un caida di prijs, cu a contribui cu un efecto di -1.39 ppt y pa e restante 16.7% no tawata tin cambio den prijs. Prijsnan di bienes a baha cu 0.2% y a causa un efecto di -0.11 ppt. Prijsnan di servicionan a baha cu 0.3% y tawata tin un efecto di -0.10 ppt riba CPI di September 2022.

Core inflation

E CPIC (core inflation) – CPI excluyendo e efecto di energia y cuminda – a registra na September 2022 un subida di 2.7%. E indice di energia – cu ta consisti di e productonan: electricidad, awa, gasolin y diesel a registra un subida di 11.9%. E indice di cuminda a registra un subida di 8.0%.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na September 2022 ta Afl. 5,309, un subida di Afl. 470 compara cu September 2021 (Afl. 4,839). E bestaansminimum pa un hogar di un (1) adulto ta Afl. 2,528, un subida di Afl. 224 compara cu September 2021 (Afl. 2,304).

Cambio di prijs di petroleo, utilidad, gasolin y diesel na september 2022

Ta determina e prijs di utilidad (electricidad y awa), gasolin y diesel primordialmente door di e prijs internacional di petroleo. Na september 2022 e prijs promedio pa bari di petroleo (US$ 85.37) a conoce un caida di US$ 8.37 (-8.9%) compara cu augustus 2022 (US$ 93.74), e di tres caida consecutivo.

Na september e prijs promedio di electricidad pa vivienda no a cambia compara cu augustus 2022 y a keda Afl. 294.56, mientras cu e prijs promedio di awa pa vivienda a subi cu 0.6% di Afl. 167.75 pa Afl. 168.73 y tawata tin un efecto di 0.02 ppt riba e CPI di september.

Prijs di gasolin a registra un caida di Afl. 25.20 cent (-8.6%) na september 2022 y a causa un efecto di -0.49 ppt riba e CPI. Prijs di diesel a registra un caida di Afl. 8.60 cent (-3.1%) na september 2022 y a causa un efecto di -0.01 ppt riba e CPI. Na september 2022, utilidad, gasolin y diesel como grupo, tawata tin un caida di prijs di 2.5% compara cu augustus 2022 y hunto tawata tin un influencia di -0.48 ppt riba e CPI, mientras cu e restante 404 bienes y servicio hunto, a conoce un subida di prijs di 0.3% y tawata tin efecto un efecto di 0.26 ppt riba e CPI.

Cambio di prijs di Cuminda y servicio di catering na september 2022

E indice di “Cuminda & servicio di catering” a registra un subida di 0.5% na september 2022, despues di un subida di 1.4% na augustus 2022. E indice di “Cuminda na cas” (0.6%) a registra un subida, unda nuebe (9) di e diesun (11) indicenan di e gruponan di cuminda na cas a subi na september 2022. E indice di “Batata, yuca y batata dushi” a conoce e subida di mas grandi (4.0%) na september 2022. Otro subidanan significante registra tabata den e indicenan di “Fruta” (2.9%), “Azeta y otro productonan traha di vet” (2.3%), “Bebida no-alcoholico” (1.3%) y “Pan y otro productonan di grano” (1.1%). E unico dos caidanan registra den e indice na september 2022 di “Berdura” (-2.6%) y “Pisca y otro cuminda di lama” (-1.2%). 

Den e ultimo diesdos (12) lunanan e indice di “Cuminda & servicio di catering” a subi cu 10.3%. E indice di “Cuminda na cas” a conoce un subida di 12.1%, unda tur e diesun (11) indicenan di e gruponan di cuminda na cas a subi durante e ultimo aña. E indice di “Azeta y otro productonan traha di vet” a subi cu 17.4%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Carni” (16.0%), “Fruta” (14.4%), “Lechi, keshi y webo” (13.6%), “Pisca y otro cuminda di lama” (13.1%) y “Batata, yuca y batata dushi” (12.3%). 

E indice di “Cuminda pafo di cas” a subi cu 0.4% na september 2022 y a registra un subida di 5.9% den e ultimo diesdos (12) lunanan. Na september 2022, “Cuminda na cas” y “Cuminda pafo di cas” como grupo, tawata tin un subida di prijs di 0.5% compara cu augustus 2022 y hunto tawata tin un influencia di 0.08 ppt riba e CPI, mientras cu e restante bienes y servicio hunto a experencia un caida di prijs di 0.4% y tawata tin un efecto di -0.30 ppt riba e CPI.

Bestaansminimum na september 2022

E bestaansminimum ta e nivel minimo di entrada cual percepcion ta cu e ta necesario pa logra mantene un nivel di bida adecuado den un cierto pais. Usualmente ta determina e bestaansminimum door di calcula e gasto di tur e recursonan esencial cu un adulto ta consumi den un luna of aña. Generalmente esaki ta yam’e un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Ta uza escalanan di ekivalencia pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0-14 aña). E bestaansminimum ta basa riba cifranan di e rapport “Bestaansminimum 2010” cu CBS a publica na december 2010 y ta actualis’e mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-14 aña).

Na september 2022 e bestaansminimum mensual pa un hogar cu ta consisti di dos (2) adulto y dos (2) mucha (edad 0- 14 aña) (Afl. 5,309) ta mustra un subida di Afl. 470 compara cu september 2021 (Afl. 4,839). Esaki ta causa principalmente door di un subidanan di Afl. 234 y Afl. 167 den e sectornan di “Cuminda y bebida no-alcoholico” y “Vivienda”, respectivamente.