NV ELMAR: Tarifa ta baha un poco pero purba spaar riba consumo

Naamloze Vennootschap Electriciteit-Maatschappij Aruba “ELMAR” ta participa cu entrante 1 di mei 2023, e prijs di coriente ta baha cu 7.1%. E reduccion aki a bira posibel debi cu e tarifa di compra di energia cu ELMAR ta paga na WEB a baha, asina nos compania nacional di distribucion di coriente a informa den un relato di prensa. Esaki despues cu di den fin di siman gobierno a anuncia esaki caba, cu e hashtag #bonnoticia. Pueblo sinembargo a keda cuestiona con a subie cu 24% y awo ta bah’e cu 7.1%. 

Na aña 2022, ELMAR a anuncia un aumento di prijs di coriente debi na factornan internacional for di nan control, cu a influencia costo di generacion di energia substancialmente. Sinembargo, awor cu a logra negocia un miho tarifa di compra di energia for di WEB, a crea espacio suficiente cu ta permiti ELMAR baha e prijs di coriente pa consumidornan.  

ELMAR tin comprension pa e impacto cu e aumento di prijs por tin riba presupuesto di cada persona of famia y a bisa di ta spera cu e reduccion aki lo duna algun alivio. Ta pidi comunidad tuma nota di e siguiente tabel cu ta indica e prijs nobo di coriente.

ELMAR ta tuma e oportunidad aki tambe pa recorda nos clientenan pa ta consciente di nan consumo di coriente y unda ta posibel pa tuma pasonan pa reduci nan uzo. Accionnan chikito manera revisa bo cas pa saca plug of paga aparatonan cu no mester ta cendi por haci un diferencia den reduci bo factura di coriente.

ELMAR lo sigui informa su clientenan di cualkier desaroyo.