Noticiero di Atardi ta un realidad na X-FM 102.7

Recientemente Aruba a conoce un emisora radial nobo ariba e frecuencia di 102.7. Ta trata di X-FM cu ta forma parti di e proyecto ‘The Future of Media’. Diamars awor dia 11 di october pa 5’or di atardi e di dos programa di e emisora lo cuminsa. Ta trata di un noticiero di atardi cu ta hiba e nomber di ‘Newsflash’ presenta pa Mark Benson Denz. Despues di dos aña y mey ausente riba radio, e locutor/reportero lo ta bek ariba e frecuencia di FM. E idea ta pa por presenta un noticiero diferente, al caso, obhetivo y transparente. E mercado cu e noticiero lo dirigi su mes ta specialmente pa esnan cu a caba di traha y kier ta informa di locual a pasa of ta pasando durante e ultimo 12 oranan di dia. E emisora X-FM ta transmiti for di su studionan principal den caya grandi y tin e studio di mas moderno di Aruba. E oyente no lo por solamente scucha e noticia, pero tambe mira esaki cu video. Esaki ta conta tanto pa e presentador como mayoria di e noticianan. Lo por mira esaki via di facebook di X-FM, 24ora y www.xfmaruba.com .

Varios biaha pa siman lo tin invitadonan tambe den e ultimo parti di e programa como ‘Highlight’ di dia. E noticiero lo conta tambe cu e titularnan di noticia internacional y tecnologia.