E promé selekshon nashonal ku lo representá Kòrsou pa e aña aki lo ta nos selekshon maskulino kategoria U-17 ku ta praktikamente kla pa partisipá na e CONCACAF U-17 Championship aya na Guatemala. E kampionato aki lo tuma lugá di 11 pa 26 di febrüari 2023 i ta konta ku partisipashon di 16 pais.
Nos selekshon ta forma parti di grupo E i lo enfrentá Mexico, Panama i e pais anfitrion, Guatemala. Nos promé partido lo tuma lugá dia 11 febrüari kontra Mexico, pa seguidamente nos topa Panama dia 13 di febrüari i nos último partido lo ta dia 15 febrüari 2023 kaminda nos lo enfrentá Guatemala. Despues di e promé i segundo buèlta lo sigui pa e partidonan di kuart final, semi final i final. Dianan 21 i 22 di febrüari 2023 e partidonan di kuart final lo tuma lugá, 24 di febrüari 2023 ta weganan di semi final i e gran final lo ta 26 di febrüari 2023.
Nos selekshon ya tin algun luna ta praktiká i preparando pa saka kara di Kòrsou. Un grupo di 20 hungadó ta forma parti di nos selekshon nashonal maskulino kategoria U-17. E hungadónan aki ta hungadónan áktivo den Kampionato Hubenil pero tambe tin algun hungadó residensiá den eksterior ku a bin pa reforsá nos selekshon.
Nos selekshon ta wòrdu dirigí pa sr. Demy Rosario ku ta wòrdu asistí pa sr. Rowendy Sumter komo entrenadó di portero. Sr. Ebenezer Lourentz ta e masahista miéntras dòkter Ramfis Fillet tambe ta kompañá e selekshon i sr. Oliver Windster ta esun enkargá ku e materialnan di nos selekshon. Nos direktor tékniko sr. Dean Gorré i e ofisial di prensa sr. Rogier Schultz tambe lo biaha ku e selekshon i e hefe di delegashon ta sr. Remfis Donker, miembro di direktiva di FFK.
E siguiente hungadónan ta forma parti di nos selekshon;
1 Irdjoailly Emelina (Atletiko Saliña)
2 Declan Kleiboer (v.v. Hoogstraten)
3 Rochendrick Mathilda (Inter Willemstad)
4 Dayshawn Isabella (New Song)
5 Noah Calister (Atletiko Saliña)
6 Shuvienchelo Hooi (Vesta)
7 Giandro Sambo (Ajax)
8 Luigi Inesia (New Song)
9 Carlos Seintje (Feyenoord)
10 Demiane Agustien (Derby County)
11 Gediel Vicento (New Song)
12 Quishurean Jourdain (C-Stars United)
13 Tarino Marchena (Inter Willemstad)
14 Cristian Pop (Subt)
15 Shermayn Rombley (Subt)
16 Darwin Lourens (Subt)
17 Jeandino Windster (Victory Boys)
18 Sebastian van Woerkom Mejias (Inter Willemstad)
19 Patrick Hook (Atletiko Saliña)
20 Kevin Hato (Subt)
Preparashonnan ta kanando den ful swing pa nos selekshon nashonal U-17 ku lo biaha próksimamente pa Guatemala.
Keda pendiente pa mas informashon…
5 febrüari 2023
