Manera ta kustumber, kada dos aña CFU ta organisá su Under 14 Challenge series. Un aña ta pa e mucha hòmbernan i e aña siguiente ta pa e mucha muhénan. E aña aki a toka e turno pa e mucha hòmbernan i ku sumo plaser FFK ta informá ku Kòrsou su tim maskulino kategoria U-14 a wòrdu invitá pa partisipá na CFU Boys’ Under 14 Challenge Series 2022 na Repúblika Dominikana.
Nos a aseptá e invitashon i nos hungadónan ta den ful preparashon pa nan kompromisonan aya na Repúblika Dominikana. Ya nos selekshon tin un temporada largu ta entrená i a partisipá na algun torneo p’asina ta mihó prepará pa saka kara di Kòrsou.
Nos selekshon lo enfrentá: Repúblika Dominikana, Puerto Rico i Boneiru den e promé buèlta.
Skema di nos partidonan:
| Fecha | Orario | Tim di kas | Bishitante | Stadion | |
| 1 | 14 oug. 22 | 18:00 | Kòrsou | Repúblika Dominikana |
Stadion Olimpico Sanchez |
| 2 | 15 oug. 22 | 16:00 | Kòrsou | Puerto Rico | |
| 3 | 16 oug. 22 | 16:00 | Boneiru | Kòrsou |
Despues di e promé buèlta lo sigui pa e kuart final, semi final i final. Dia 18 di ougùstùs 2022 e partidonan di kuart final lo tuma lugá, 19 di ougùstùs 2022 ta weganan di semi final i e gran final lo ta 21 di ougùstùs 2022.
Nos selekshon ta konsistí di 20 hungadó i un staf di 5 persona.
Keda pendiente pa mas informashon di nos selekshon U-14 den e próksimo dianan…
8 ougùstùs 2022
