Nos obediencia ta activa nos bendicion

Den e temporada bunita aki cual nos tur como yiunan di Dios ta prepara pa nacemento di nos Rey, Maestro y Señor Cristo Hesus, nos mester no permiti e enemigo bin kita nos paz, pero nos mester keda den presencia di Dios constantemente y asina alcansa e bendicion cu Dios tin pa nos.

Aunke tin decision cu ta den man di hende, nos no tin cu lubida cu e poder ta den man di Dios. Hende kier hunga rol di Dios poniendo exigencia, pa cumpli cu palabra di Dios. Pero Dios en cambio, no por wordo manipula, den ningun situacion, pasobra tur locual hende sembra nan lo cosecha.

E temporada aki ta demasiado bunita, pa nos laga cosnan carnal kita nos atencion for di cosnan grandi Spiritual cu Dios a haci y cu Dios lo sigui haci meymey di nos.

Den Lucas 1:37+38 ta para skirbi na prome luga e Angel ta bisa Maria: Pasobra pa Dios nada lo ta imposibel. Y Maria a contesta: Ata e sirbido di Señor, laga sosode cu mi segun bo palabra nan. Y e angel a kita bay laga Maria.

Den nos obediencia, Dios ta manda su presencia, y tur locual nos tin mester ta e presencia di Dios den nos bida. Tambe ora nos lesa y scucha Dios su palabra. Algo grandi ta sosode den nos bida, pasobra den Su Palabra Su Spirito ta, y asina, E ta toca nos curason hiba nos na obediencia.

Awor no ta tur cu a tende di Dios of conoce Dios kier obedece Dios. Tin cu sa e boluntad di Dios, kier pone Dios na prueba. Y en bes di obedece Dios, nan kier pone condicion y exigi di Dios. Pasobra esey ta e formula diabolico cu tin awendia riba e mundo aki, pa demostra mas desobediencia posibel na e palabra di Dios. Dios su principio y tur locual Dios a establece.

Y e diabel kier hala masa di hende su tras den su caminda di engaño, pasobra e kier atencion, manifestacion y confrontacion carnal, cual ta baha e yiunan di Dios bao di e nivel. Dios a yama nan, pa asina e por logra kita pas di hende, pasobra di otro manera e no por logra su meta. El a faya den cielo y awor tambe e bay faya na tera.

Pasobra e yiunan di Dios ta convenci cu nan lucha no ta contra carni y sanger, pero contra gobernantenan y contra podernan, contra e forsanan mundial di e scuridad aki, contra e forsanan spiritual di maldad den luga celestial (Efesionan 5:12).
P’esey tuma e armadura, completo di Dios, pa boso por resisti e dia malo, y despues di haci tur cos para firme (Efesios 5:13).

Den e temporada bunita aki di Pasco, cual nos tur atencion mester ta riba nacemento di Señor Hesus, e enemigo a bini cu nubia scur tratando asina di forsa pa acepta maldad, inmoralidad y abominacion.

Hende sabi ta haci oracion y ta pone tur cos den man di Dios, y nos tin di tuma ehempel di hende sabi, manera rey Ezequias den Isaias 37: 14-22 kende a tuma e carta di rey Senaquerib kende tabata e representante di diabel den e caso aki, y e a hiba e carta den cas di Dios y a pone habri dilanti di Dios.

Y rey Ezequias a haci oracion y confia Dios y Dios a atende su peticion y a sali grandemente na su defensa. Esunnan cu ta obedece Dios semper lo tin e victoria, den tur cos. Pasobra obediencia ta activa bendicion.