Nos actitud di gratitud na Dios ta beneficioso pa nos bida

Mas cu cuanter tormenta a wordo forma banda di nos, pero Dios no a permiti pa ningun haci daño na nos, ta tempo pa nos halsa nos bos y sea agradecido na Dios.

Nos mester ta agradecido y mustra respet y reverencia na Dios, pasobra nos tin di corda cu ta Dios so por hacie pa nos, pasobra ningun hende por desvia un mal tempo, solamente Dios tin dominio riba naturalesa.

E actitud di gratitud ta haci nos contento tur dia, y ta demostra fe y confiansa den Dios.

Tin un diferencia hopi grandi entre un persona agradecido y un murmurado, esun agradecido ta florece tur dia, y esun murmurado ta keha tur dia y no ta mira nada bon ta bini, pasobra su murmuracion ta blokia su bida spiritual, y no ta aprecia e porta di bendicion cu Dios a habri pa su bida.

Tin hopi beneficio den un actitud di gratitud:

Gratitud ta glorifica Dios ( 2 Corintiona 4;15)

Gratitud ta yuda nos mira e bondad di Dios (Santiago 1:16-17)

Gratitud ta pone nos den boluntad di Dios.( 1 Thesalonicences 5:18)

Gratitud ta trece pas ( Filipensenan 4:6-7).

Gratitud ta hala nos serca Dios (Lucas 17:17-19)

Gratitud ta haci nos contento (1 Timoteo 6:6-8).

Gratitud ta crece nos Fe (Salmo 136:1)

Gratitud ta hiba nos na goso ( Salmo 126:1-3).

Gratitud ta kibra mentira di satanas (Salmo 84:11).

Gratitud ta warda nos for di e enemigo (Salmo 138:1).

Gratitud ta un testimonio ( Salmo 105:1).

Ma gracia sea na Dios, kende ta duna nos e victoria, pa medio di nos Señor Hesus Cristo. P’esey mi rumannan stima, sea firme, constante , semper abundando den e trabao di Señor, sabiendo cu boso trabao no ta envano den Señor. (1 Corintionan 15:57-58)

Nos mester lanta nos yuinan agradecido na Dios den tur cos, asina nos ta trahando un bon futuro pa nan.

Nos ta agradecido na Dios pa nos relacion cu Dios ( Romanonan 8:38+39)

Nos ta agradecido na Dios pa bida eterna ( 1 Corintionan 15:17)

Nos ta agradecido na Dios pa gracia y pordon ( Efesionan 1:7).

Nos ta agradecido na Dios pa Su creacion ( Genesis 1:28).

Nos ta agradecido na Dios pa Su palabtra ( Hebreonan 4:12).

Nos ta agradecido na Dios pa nos prohimo ( Hebreonan 10:25).

Nos ta agredecido na Dios pasobra Dios nunca ta laga nos na caya (Josue 1:9 y Salmo 139:8 ).

Ta imposibel pa un hende ta biba den inmoralidad y pretende cu e ta gradecido na Dios, tene bon cuenta cu pica ta aparta nos for di Dios, ora nos ta biba robes, apartando nos mes for di e caminda di  Dios, nos mester arepenti pa nos por bira agradecido na Dios.

E actitud di gratitud ta cana hunto cu madurez, hende madura ta agradecido tur dia, pasobra nan ta corda kico Dios a haci pa nan y kico Dios ta haciendo pa nan tur dia, pasobra nan sa cu sin Dios lo no tabatin cambio den nan bida.

Ora nos ta agradecido na Dios nos ta gusta yuda hende, pasobra nos a compronde e bondad di Dios, cu mas agradecido un persona por ta , mas e su bida ta florece.

Nos hogar mester ta un hogar di gradicimento, pasobra eyden Señor ta biba , caminda su nomber ta wordo halsa na tur momento, caminda su presencia ta wordo adora.

Actitud di gratitud mester sali for di pofundo di nos curason.

Sinceramente, Pastor Marcel Balootje.