No por sigui subsidia mas: Aumento di 30% riba tarifa di gas pa cas

Para hunto cu Minister di Asuntonan Economico, mr. Geoffrey Wever, director di Arugas, Paul Arends, a anuncia aumento di prijs pa boter di gas di 100 liber. E prijs ta maximalisa pa hopi aña, cual tabata estableci na 46.38 florin pa cada butishi di gas. Pero despues di e desaroyo cu ta tumando luga rond mundo, Arugas a haya nan den un situacion financiero precario y no por a want’e mas. Prijs nobo ta bira 60 florin entrante 15 di november.

E compania a haci peticion pa aumenta e prijs aki. Minister di Asunto Economico, Comunicacion y Desaroyo Sostenibel, mr. Geoffrey Wever, a splica cu nan a bay den combersacion y a haci un calculacion dje prijs. E aña aki nan tin un perdida di casi 1.8 miyon y Arugas no por sigui subsidia pa wanta e prijs abou. A haci un calculacion y e resultado a mustra cu ta bou dje prijs di mercado internacional, p’esey a tuma e decision di aumenta e prijs.

Tambe a reduci e cantidad di seis (6) cilinder di gas pa aña y a bah’e na cuater. Ta sospecha cu hopi hende ta uza e butishi di gas di 100 liber, destina pa uzo domestico, cu toch ta uz’e pa uzo comercial. Pues despues di cuater butishi pa aña, lo cobra prijs di mercado, pues no subsidia. E mandatario a enfatisa cu esaki tabata un decision cu mester a tuma. Arugus a bay di acuerdo cu gobierno p’e aumento aki ta simplemente pa break even den nan gastonan y no ta haci esaki pa ganashi.

Paul Arends, director di Arugas, a splica cu nan ta hisa prijs di gas pa uzo domestico. E prijs internacional ta surpasa e prijs cu nan ta cobra aki na Aruba. Esey ta significa cu nan no por sigui wanta esaki mas. Pa mas di diesseis aña no a ahusta prijs di cilinder, pero awo mester haci esey. Cada kwartaal ta controla e prijs internacional y lo ahusta e prijs local.