No por keda hisa prijs riba turista

Aumento di tarifa di BBO ta afecta nos sector turistico tambe. Esey ta un di e puntonan cu presidente di Camara di Comercio (KVK) a trece dilanti diamars durante un conferencia di prensa. Mescos cu e ta hisa gasto pa nos hendenan, e ta hisa gasto pa e turista cu ta bin Aruba. Ta un aumento cu e ta bay sinti den tur prijs, ademas di e inflacion cu ya tin y saliendo di e conocemento cu ya caba nos bishitante ta haya cu nos ta hopi caro como destino turistico.

“Tin hopi keho caba,” asina mr. Monica Kock a bisa indicando cu recientemente tabatin un estudio unda turista ta keha cu na Aruba nan ta paga hopi placa, pero nan no ta haya e balor pa loke nan ta paga p’e. E turista cu ta pensa cu e ta paga di mas pa bay un luga tin chens grandi cu e lo keda cas of cuminsa bay otro luga.

Mr. Kock: “Paso ban ta honesto. Di e turista nos ta biba. Nos a haya sa ora hotel a cera y si nan dicidi di no bin, nos a wak e consecuencia caba. Nos no por wanta esey y esey nos sa di awo caba.”