No a topa droga ni arma: A detene capitan pa no sigui ordo di wardacosta

Diamars atardi alrededor di 4:25 pm un patruya di Metal Shark a duna un boto local señal pa para. E capitan y su tripulante no ta contento cu e trato cu nan ta bin ta ricibiendo for di wardacosta. E tripulante ta un piscado conoci pariba di brug, esta Laveist. Laveist a conta cu; wardacosta tin tres dia ta para nan pa control.

Parce nan ta sali for di awa teritorial y ora nan regresa, wardacosta ta baha riba nan pa tene control. Ayera tabatin un situacion menos bunita unda cu a bay cu nan na Kazerne y ora a termina cu e control, a bisa nan pa; dal bay numa, mientras cu e boto tabatin algun problema, segun Laveist.

Awe, e capitan di e boto no a respeta nan señal, el a bisa nan cu; si bo kier controla mi, bin na pier na Rodgers Beach. Na pier, a cuminsa cu un control intensivo riba e boto. Pa siguridad, a pidi refuerso di polis. Personal di KIA cu nan K9-unit tambe a presenta na sitio.

E cacho a controla e boto pero no a topa cu nada. Na final a detene e capitan pa no sigui ordo di autoridad. Den un transporte policial a bay cu ne direccion warda di polis. Den jug abordo, a topa cu dos pisca, cual tabata nan ‘catch of the day.’