“Niet Netjes”.
Gabinete Pisas tin ku stòp di manipulá, tira falta i asumí su responsabilidat.
Ya ta vários biaha ku Minister Silvania riba retnan sosial ta insinuá ku e 12.5% ta wantá serka Parlamento, ya ku e lei di “normering topinkomens” no a wòrdu tratá dor di parlamento. El a asta bisa sindikatonan ku ta Parlamento tin nan 12.5% wantá. Esaki ta nada mas ku un manipulashon i tiramentu di falta. Pa e motibu ei ta nesesario pa refreská memoria di Minister i nos komunidat.
Gabinete Pisas a aseptá pa RMR mara e 12.5% na lei di topinkomens!
Na promé lugá, den e lei pa e 12.5% ku “Gabinete anterior” a presentá basá riba eksigensia di Hulanda pa solidaridat i finansiamentu di likides durante pandemia, fin di e 12.5% ta basá riba un desishon di Gobièrnu di Kòrsou. Ningun momentu esaki tabata mará na lei di “topinkomens”.Ta Gabinete Pisas ta esun ku a anunsiá dia 30 di mei último, ku Sekretario di Estado Van Huffelen a mara finalisashon di e 12.5% na e lei di topinkomens, NO gabinete Rhuggenaath. Apesar ku Parlamento a bisa den un moshon ku esaki NO ta korekto, klaramente Gabinete Pisas a aseptá e kondishon aki, te ku awor Minister Silvania a pidi pèrmit por eskrito na sra Van Huffelen pa kambia e kondishon.
Gabinete Pisas a “drumi riba” e lei di topinkomens, no Parlamento!
Parlamento di Kòrsou a atendé e lei di topinkomens 9 di yüni 2021 i a manda preguntanan pa Gobièrnu. Gabinete Pisas a “dòni” i a warda 1 aña kompletu pa kontesta e preguntanan di parlamento! Kontesta a yega Parlamento 10 di yüni 2022. Pues e lei a keda drumí serka Gabinete Pisas ; 1 aña largu. No serka Parlamento!
Minister Silvania tin e lei wantá, no parlamento!
Por último, momentu ku parlamento a risibí e lei porfin serka Gobièrnu, e lei no tabata kla pa wòrdu tratá. P’esei Parlamento a disidí pa skucha ekspertonan i asina duna Gobièrnu tempu pa kambia e lei òf trese kambio e mes. Ta e trayekto aki Minister Silvania ta kanando dor di sinta ku tòp di e entidatnan inisio di ougùstùs 2022, risibí informashon serka nan, te pa entretantu e pidi “Hefe” sra Van Huffelen pèrmit pa por hasi kambio na e lei. Manera Minister mes a deklará den su komunikado, a base di kontesta di “Hefe” Van Huffelen, e ta determiná si ta hasi kambio na e lei òf Parlamento tin ku trata esaki manera e ta.
Pues no ta Parlamento ta tardando e 12.5%. Ta desishonnan di Gabinete Pisas tin esaki wantá.
Minister Silvania lo hasi bon na rekonosé e realidat aki i stòp di manipulá i tira falta riba otronan.
