Nel Oduber ta pronostica hopi pobresa y criminalidad na Aruba

El a sirbi nos pais pa hopi aña den Conseho Insular, Bestuurscollege, Parlamento di Aruba y tres biaha como minister-president. E ta lider honorario di MEP y ta tata di un minister den funcion. E tin un opinion skerpi riba loke ta sosodiendo. E no tin un solucion den cortamento di gasto, elimina leasmento di auto caro, pago na oficina di abogado bi huur di edificio. E ta haya cu Hulanda mester exonera e debe di seis biyon florin di Aruba y asina haci cu nos pueblo y gobierno por hala rosea trankil atrobe.

“College Aruba financieel toezicht (CAft) tin 5 aña ta stroba gobierno goberna den trankilidad, treciendo tur dia instabilidad y insiguridad”, asina Nelson Oduber, ex-Minister Presidente di Aruba, a opina awe riba su pagina di Facebook.

Nelson Orlando Oduber, naci dia 7 di februari 1947, pues di 75 aña di edad, ta lider honorario di Partido Movimiento Electoral di Pueblo (MEP). El a integra den e partido na aña 1975. El a bira Minister Presidente pa prome biaha na aña 1989 y a keda den funcion te 1994. Na aña 2001 el a bira minister-president pa di dos biaha y a bolbe gana eleccion, aunke perdiendo asiento na 2005, pero a sigui goberna pa di tres termino como Prome Minister. E ta casa cu Glenda Oduber-Croes y ta tata di Glenson, Danguillaume y Nelson Jr.

“Ora bo lesa pronostico di Fondo Monetario Internacional (IMF) cu ki porcentahe nan ta pronostica inflacion na Merca, cu ta nos parner mas grandi pa casi henter nos desaroyo economico y den Latino America cu ta banda di nos, cu sin duda lo tin consecuencia drastico pa nos cu ta importa casi tur cos, pues consecuentemente Aruba sin duda ta importa e inflacion aki tambe. No lubida cu na Europa tambe nos ta importa for di varios pais”, segun e ex-mandatario y tata di actual Minister di Turismo y Salud Publico.

“Ora abo como IMF ta pronostica sorto di noticianan asina devastador, a bira tempo tambe pa bin cu conseho, sugerencia kico por haci pa alivia e situacion, pasobra cu e pronosticonan aki e problemanan financiero ta mas grandi so nan ta keda bira pa no papia mes cu den paisnan cu e inflacion lo dal mas duro, ta den gruponan grandi hende nan lo sali di nan pais pa busca miho futuro pa nan hendenan”.

Nel Oduber ta convenci cu e cambionan cu lo bin na Colombia lo tin su efectonan pa Aruba, mescos cu a mir’e cu Venezuela. “Mientras cu e menasanan pa nos existencia, miho bisa, nos sobrevivencia como pais aki na Aruba, nos tin cinco aña ta laba cabes di burico cu CAft cu ta contra statuto y nos constitucion”, asina e lider honorario di partido MEP ta opina.

“Berdad mester ser bisa cu ta nos politiconan a biba den ‘Alice in Wonderland’, haciendo debenan astronomico cu lo mara 7.5 gabinete cu Hulanda y abo sa cu e problemanan di dje, efectonan di e pandemia y awor e guera na Ucraina ta hopi dificil un economia chikito manera di nos por logra paga 6 biyon florin di debe, unda mayoria entrada ta bay pa paga debe cu interes so. Mientras cu Hulanda sa kico ta pasando cu mayoria pais y cu e problema acerca di inflacion, aumento drastico di gastonan di energia, nos lo end-up den un callejon sin salida of aki tambe nos hendenan lo cuminsa move.”

Nel Oduber ta conseha e politiconan actual cu “Si bo ta goberna cu vision, bo sa cu CAft no por keda pone condicion pa sigui corta den carni y weso. E momento a yega pa duna nos kwijtschelding di e placa cu nos a fia di bo door di e pandemia, pa duna nos espacio pa por sigui hala rosea, mescos abo como pais a haya un par di biyon Euro pa e efectonan di e pandemia for di Union Europeo, cu segun nos tambe ta asocia. Si IMF mes ta parti pronostico desastroso pa nos akibanda, bo tambe mustra cara pa elimina e metemento di CAft y abo mes como gobierno negocia cu nos gobierno con ta sigui. Mi ta pronostica si esaki no sosode lo bo mira un situacion di un aumento drastico di pobresa y criminalidad internacional ta ser treci aki pa nos. Bo mes ta mira ta 400 kilo di cocaina ya ta ser gara cu lo tin su repercucionnan pa nos. Un advertencia di un cu ta mira cos ta bin ariba nos y no kier ‘parawaak’. Un contribucion di un cu a pasa den varios situacion den gobernacion.”