Nathan de Cuba a scapa un biaha mas: Declara liber di intento di asesinato

Pa di dos biaha e hoben Nathan de Cuba a scapa for di husticia. Diabierna mainta e tabata dilanti mesa berde cu un acusacion basta pisa contra dje: intento di asesinato (di mata) y posesion di arma di candela. Y no ta prome biaha cu e ta den man di polis pa algo asina. “Bo ta bisa bo no ta den gang, pero cada bes bo nomber ta aparece,” tanto fiscal como hues a bis’e esaki. 

E hoben di 18 aña ta nenga e acusacion den Corte y a bisa e Magistrado tambe cu for di momento cu polis a busc’e, el a declara cu e no a tira y e no ta den ningun gang. Su unico conexion ta cu e tabata bon amigo cu Sammy Ignacio, kende tabata su bisiña y di cual nan a tir’e mata. 

E echo aki a tuma luga den bario di Sabana Basora y dos hoben, un di nan menor di edad a entrega keho cu un persona a pasa tira den laira, den nan direccion. E hobennan a declara cu e persona tabata den un Nissan March y a pasa dilanti nan cas, a saca un man y los tiro. Un di nan ta bisa cu el a reconoce e mucha homber Nathan aki. 

Riba pregunta di hues e acusado a bisa cu esun cu ta acus’e conoce bon pasobra nan a bay scol hunto. Pero cu e momento di e suceso e tabata na su cas hunto cu su amiga. 

E declaracion di Nathan tabata manera bruha, pasobra e tabata bisa cu e tabata den compania di amigo, pero esakinan ta nenga y e no tabata kier a duna polis informacion di su amiga. Den corte el a splica cu e no tabata kier a involucra su amiga den un problema cu e no tin nada di haber cu ne.

Ta resulta cu e mucha homber aki a bay solamente dos aña di EPB. El a haya algun problema cu algun otro studiante relaciona cu e matamento di su amigo y e no tabata kier a hay’e den problema y el a stop di bay scol. El a dicidi pa busca trabou. 

Riba tur pregunta haci na dje, e ta bisa cu e no ta forma parti di e gang. Simplemente pa motibo cu e ta biba den e bario y tin amigo eyden, nan ta kere cu e tambe ta forma parti di e gang, pero ta bisa cu esey no ta berdad. 

Reclassering a haci un quick scan y a conclui mirando e caso den cual den pasado a menciona su nomber y e echo aki, ta miho pone bou guia di Reclassering pa e haya e guia necesario. 

Fiscal a a trece dilanti cu investigacion haci relaciona cu tiramento ta mustra cu esaki tin di haber cu gang. Hopi tiramento sin sentido. El a mustra e casonan cu a tuma luga recientemente, di cual un di e victimanan aparentemente tabata di un gang di Pos Chikito. Y e detencionnan cu a tuma luga relaciona cu e ultimo caso ta mustra cu e tin algo di haber cu gangnan. 

A bisa e acusado cu cada biaha su nomber ta aparece. A menciona su nomber den e tiramento aki na Sabana Basora cu a tuma luga dia 10 di mei 2022. Por sosode cu aunke e ta bisa cu e no ta forma parti di gang, nan por tira riba dje tambe. 

Fiscal ta convenci cu el a tira, pero e prueba no ta suficiente. Tin un solo declaracion cu ta menciona cu a reconoce, e otro no a reconoce. E no por haci otro cu pidi vrijspraak p’e, cu un advertencia pa e keda leu di e casonan aki y di gangnan.

Esaki tabata e ponencianan tambe cu su abogado mr. Kip tabata di trece dilanti y pidi vrijspraak p’e. Su cliente ta insisti cu e no a tira. E abogado a papia di declaracionnan cu ta contradeci otro.

Tambe e abogado a bisa cu e quick scan di Reclassering ta yen di cosnan cu nan ta saca nan conclusion y esaki ta debi, no na e personal di e instituto pero debi cu na ultimo ora a haci e peticion y cu nan no tabatin suficiente tempo pa traha un rapport amplio y drechi. E ta bisa esaki pasobra nan a uza informacion di un investigacion cu a haci contra di su cliente di un caso den cual no tin prueba contra dje y fiscal a keda di seponeer e caso. Esey no a wordo haci ainda. 

Hues a sera tratamento di e caso y a dicta sentencia mesora. Hues tambe a conclui cu no tin prueba pero a duna e acusado algun conseho tambe. Pa di dos biaha cu bo ta haya bo mes den un caso unda ta acusa bo falsamente di intento di mata. Esaki ta debi cu bo ta andando cu cierto hende di e gang di Pos Chikito y esey ta crea e impresion cu bo tambe ta forma parti di gang. Wak bon cu kende bo ta anda. Bay caba bo curso y busca un trabou pa sigura un bon futuro pa bo y aleha di amistadnan malo. Hues a declar’e liber di tur acusacion.