Nan mes a basha bou: A detene contrabandista di hende

No a dura mucho, despues cu Robert Laveist a duna un entrevista exclusivo durante e noticiero ENFOKE, den cual el a conta cu “luho y detaye” di con e negoshi ta di transporta hende for di Venezuela pa Aruba, cuanto ta cobra pa e ‘buelta’ y tambe riba e caso di e mucha muhe Venezolana cu a “perde” den e trayecto entre Venezuela pa Aruba. Polis a sigui e entrevista masha di cerca y awe mainta a detene ambos, sospecha di sa mas di e desaparicion di e victima y tambe riba nan “negocio redondo” di cobra pa transporta hende di pazuid pa costanan di Aruba.

Ta trata aki di e hombernan Robert Laveist di 45 aña y Reangelo Stamper di 34 aña. Recherche di Unit Mensensmokkel-Mensenhandel (UMM) a detene nan relaciona cu un caso di contrabanda di hende. No ta descarta cu lo tin mas detencion.

Ambos tin record caba cu husticia y tabata meti den tipo di casonan asina caba, den cual hende a “perde” riba lama. Den e caso specifico aki, famia di e Venezolana perdi tambe a cuminsa bira nervioso y kier vengansa, cu ta haci nan caya “hot”. Riba dje, ta bin acerca cu husticia Venezolano tambe ta pidi pa nan y ta acusa nan di lo sa mas of di ta meti den e supuesto perdemento di un ciudadano di nan.

E crimen di contrabanda di hende tin un castigo di mas cu cuater aña di prizon, pues suficiente cu husticia por opta pa wanta sospechosonan encarcela te dia nan caso bin padilanti.