Na monumento di Inmaculada Curason di Maria ta bay tin resamento di rosario

Grupo di Oracion Inmaculada Curason di Maria ta recorda tur devoto di Mama Maria cu diamars 13 di december 2022, tur devoto y fiel ta reuni pa 6:00 pm na e monumento di Inmaculada Curason di Maria na Sta. Cruz.

Ta resa rosario prome cu Santa Eucaristia. Diamars tur hende ta bin resa misterio Doloroso. Aunke cu nan ta ansioso pa e dia grandi di nacemento di Cristo yega, nan kier ta bon prepara, si prepara nan mes spiritualmente. Manera di atende misa di aurora. Ta un sacrificio grandi pa lanta den marduga pa sinti e esfera di Pasco. Si tur cas tin nan pesebre, unda cu tin paz y humildad. Cu un angel ta cuida nos, cu ta trece e bon noticia.

Juan Bautista tambe a anuncia e binida di Cristo. E mayornan nan obligacion ta pa cuida nan yiunan, duna nan bon ehempel. Respeta bo crianan y nan lo respeta bo. Unda cu nan bay, na school den deporte cu amistad of den nan trabou. Loke nan haya na cas, nan ta sigui cu e custumber di cas.

Cu Dios bendiciona Aruba. Otro aña lo ta diferente, cu otro añanan. Biba cu perspectiva, haci cambio den bo hogar. Pone Dios central den bo hogar. Resa Santo Rosario, asisti na Santo Sacrificio di misa. Fin di aña ta bon pa haci un bon proposito pa e aña nobo. Pasa Un bon Pasco den seno familiar. Cuminsa un Aña Nobo yen di felicidad.