WILLEMSTAD — Direktiva di AMAK a tuma nota ku Sr. Raul Rosales, un pianista entertainer di un trayektoria basta largu a bai laga nos.
Raul Rosales ta forma parti di famia Rosales, entre otro Jose Rosales d.f.m., Dennis Rosales, tur yunan di e legendario Juan Rosales.
Raul Rosales a toka varios aña den Hotelnan lokal, manera Curacao Hilton i Holiday Inn. E tabata un músiko hopi pidí pa toka na kasamentu i hasimentu di aña.
Raul Rosales tambe a forma parti di algun agrupashon musikal, pero e ta mas konosí komo un músiko entertainer ku tin biaha ta aktua su so, pero tambe sa forma su trio i kuartetonan ku tabata toka den forma masha eksitoso. E tabata konosí pa su repertorio ku tabata konsistí di mayoria di nos piesanan di folklor i di géneronan manera wals tumba, Danza, polka etc.
Ultimo añanan ya Raul Rosales no tabata dje aktivo ei mas, pa motibu ku su salú a bai atras.
Direktiva di AMAK ta manda palabra di kondolensia na famianan di Raul Rosales i nos ta sigur ku lo e tin pas eterno ku bon Dios lo dun’é un lugá spesial den su Reino.
Raul Rosales, sosegá na pas
Direktiva di AMAK
